Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 62 Hüküm no: 23 Orijinal metin no: [6a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâslar kazasından avârızhâne karşılığı olarak kürekçi bedellerinin tahsil edilmesi Akzâ kuzâti’l-müslimîn evlâ vülâtü’l-muvahhidîn ma‘denü’l-fazl ve’l-yakīn, vârisü ulûmi’l-enbiyâ’i ve’l-mürselîn, hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki kazâ-i mezbûrda vâki‘ yüz yirmi avârız hânelerinin yetmiş bir senesine mahsûb olmak üzre avârızları mukābelesinde kürekçi bedelleri tahsîli fermânım olmağla Hazîne-i âmiremden verilen mühürlü ve nişânlı mevkūfât defteri sûreti mûcebince, ol mikdâr avârızhânelerinin her bir hânesinden dörder yüz yirmi dokuz akçe kürekçi bedelleri Tersâne-i âmirem mühimmâtı için vakit ve zamânıyla cem‘ ve tahsîl ettirilmek fermânım olmuşdur. Buyurdum ki hükm-i şerîfimle ( ) vardıkda bu bâbda sâdır olan emrim üzre amel edip dahi kazâ-i mezbûrda vâki‘ ol mikdâr avârız hânelerinin târih-i mezbûrda mahsûb olmak üzre her bir hânesinden vech-i meşrûh üzre tahsîl fermânım olan dört yüz yirmi dokuz akçe kürekçi bedeli akçeleri irsâl olunan mühürlü ve nişânlı mevkūfât defteri sûreti mûcebince Tersâne-i âmirem mühimmâtı için tahsîl ve Hazîne-i âmirem defterlerinde îrâd ve masraf olunup mevkūfât defterlerine kayd ettirmek ve bundan mâ‘adâ Tersâne-i âmirem harcı için her bir hâneden on beş akçe ve cem‘ eden mübâşirin cihet-i ma‘îşeti için onar akçe alıverip bundan ziyâde bir akçe alınmaya ve aldırmayasın. Kesr-i defterden ve naks-ı hâne ve hilâf-ı emr ve defterden te‘addî ve tecâvüzden gāyet ihtirâz eyleyesiz şöyle bilesiz alâmet-i şerîfe i‘timâd kılasın. Tahrîren fi’l-yevmi’s-sâdis ve’l-ışrîn [min] Şa‘bâni’l-mu‘azzam li sene isneteyn ve seb‘în ve elf. Be makām-ı Kostantıniyye el-mahrûse.