Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 73 Hüküm no: 38 Orijinal metin no: [9a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirne’den İstanbul’a dönen padişahın maiyeti ve davarları için menzil zahiresi tedariki Akzâ kuzâti’l-müslimîn evlâ vülâtü’l-muvahhidîn ma‘denü’l-fazli ve’l-yakīn, hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki İnşâ’allâhü te‘âlâ devlet-i ikbâl ve sa‘âdet ve iclâl ile mahrûse-i Edirne’den Âsitâne-i sa‘âdetim tarafına teveccüh-i hümâyûnum mukarrer olmağla rikâb-ı hümâyûnuma memûr olan kapım kulları ve Istabl-ı âmirem davarları için menâzil zahîresi tedârik ve ihzârı lâzım ve mühim olmağın imdi taraf-ı mîrîden akçesi verilmek üzre her bir İstanbul keyli arpa yirmi dörder akçeye ve dakīkin kilesi altmış akçeyedir ve her bir mükemmel otluk arabası yüzer akçeye ve samanın kantarı on beş akçeye ve odunun çekisi yirmişer akçeye olmak üzre kazâ-i mezbûre tâbi‘ Terkos nâhiyesinde yalnız iki bin kile şa‘îr ve iki yüz kile dakīk ve yüz araba otluk ve yalnız sekiz yüz kantar saman ve altı yüz çeki odun iştirâ ve tedârik ve Çatalca menziline nâibinle ihzâr ve nüzül emînine teslîm ettirilmek fermânım olmuşdur. Buyurdum ki hükm-i şerîfimle ( ) vardıkda bu bâbda sâdır olan emrim üzre amel edip dahi kat‘â te’hîr ve tevkīf eylemeyip zikr olunan kazâya emr-i şerîfim vardığı gibi hesâb-ı merkūm üzre mu‘accelen iştirâ ve tedârik ve nâibinle menzil-i mezbûra hâzır ve emân [âmâde] ve ordu-yı hümâyûnumda menzil emînine teslîm ettirip teslîm-i temessük mevkūfât defterlerine kayd ettiresin ki menzil-i mezbûrda ashâb-ı hukūk akçesi Hazîne-i âmirem[den] bi’t-tamâm edâ oluna ve zikr olunan zahîre iştirâsına mu‘âf ve gayr-ı mu‘âf dâhillerdir ale’s-seviyye her birisinin tahammüllerine göre tevzî‘ ve iştirâ ettirip kimesneye ta‘allül ve nizâ‘ ettirmeyesin ve tevzî‘ defterinin bir sûretin imzâlayıp ve mühürleyip mübâşir-i mezbûr ile südde-i sa‘âdetime irsâl eyleyesin el-hâsıl husûs-ı mezbûrda ihtimâm üzre olup sonradan tecessüs olundukda, hilâfı zuhûrunda[n] ziyâde hazer eyleyesin şöyle bilesin alâmet-i şerîfe i‘timâd kılasın. Tahrîren fi’l-yevmi’r-râbi‘ [min] şehri Receb sene isneteyn ve seb‘în ve elf. Mahrûse-i Edirne.