Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 74 Hüküm no: 39 Orijinal metin no: [9a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirne’den İstanbul’a dönen padişahın maiyeti halkı ve davarları için menzil zahiresi tedariki Akzâ kuzâti’l-müslimîn evlâ vülâtü’l-muvahhidîn ma‘denü’l-fazli ve’l-yakīn, hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki İnşâ’allâhü te‘âlâ devlet-i ikbâl ve sa‘âdet-i iclâl ile mahrûse-i Edirne’den Âsitâne-i sa‘âdetim tarafına teveccüh-i hümâyûnum mukarrer olmağla rikâb-ı hümâyûnuma memûr olan kapım kulları ve Istabl-ı âmirem davarları için menâzil zahîresi tedârik ve ihzârı lâzım ve mühim olmağın imdi taraf-ı hazîneden akçesi verilmek üzre her bir İstanbul kilesi arpa yirmi dörder akçeye ve dakīkin kilesi altmış akçeye ve her bir mükemmel otluk arabası yüzer akçeye ve samanın kantarı on beş akçeye ve odunun her bir çekisi yirmişer akçeye olmak üzre kazâ-i mezbûre tâbi‘ Midye nâhiyesinde iki bin kile şa‘îr ve iki yüz kile dakīk ve elli araba otluk ve beş yüz kantar saman ve iki yüz çeki odun iştirâ ve tedârik ve Çatalca menzilinde nâibinle ihzâr ve nüzül emînine teslîm ettirilmek fermânım olmuşdur. Buyurdum ki [hükm-i] şerîfimle ( ) vardıkda bu bâbda sâdır olan emrim üzre amel edip dahi kat‘â te’hîr ve tevakkuf eylemeyip zikr olunan emr-i şerîfim vardığı gibi hesâb-ı merkūm üzre mu‘accelen iştirâ ve tedârik ve nâibinle menzil-i mezbûra hâzır ve âmâde ve ordu-yı hümâyûnumda nüzül emînine teslîm ettirip ol temessükü mevkūfât defterlerine kayd ettiresin ki menzil-i mezbûrda ashâbına akçesi Hazîne-i âmireme bi’t-tamâm edâ oluna ve zikr olunan zahîre iştirâsına mu‘âf ve gayr-ı mu‘âf dâhillerdir ale’s-seviyye her birisinin tahammüllerine göre tevzî‘ ve iştirâ edip kimesneye ta‘allül ve nizâ‘ ettirmeyesin ve tevzî‘ defterinin bir sûretin imzâlayıp ve mühürleyip mübâşir-i mezbûr ile südde-i sa‘âdetime irsâl eyleyesin husûs-ı mezbûrda ihtimâm üzre olup sonradan [tecessüs] olundukda hilâfı zuhûrunda[n] ziyâde ihzâr eyleyesin şöyle bilesin alâmet-i şerîfe i‘timâd kılasın. Tahrîren fi’l-yevmi’r-râbi‘ min şehri Receb sene isneteyn ve seb‘în ve elf. El-mahrûse-i Edirne.