Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 79 Hüküm no: 45 Orijinal metin no: [10a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zâbit Ali Ağa elinde bulunan câriye Mülâyim’in Şâkire bt. Abdullah’a ait olduğu Mahrûse-i Galata a‘mâlinden kasaba-i Tophâne’de Ağa hamamı kurbunda sâkine bâ‘isü’l-kitâb [Şâ]kire bt. Abdullah nâm hâtun medîne-i Ebâ Eyyûb Ensârî’de zâbitü’l-vakt olan Ali Ağa mahzarında üzerine takrîr-i da‘vâ edip işbu hâzır bi’l-meclis orta boylu, açık kaşlı, elâ gözlü, kısa burunlu ön dişleri gedik Macariyyetü’l-asl, Türkçe bilmez Mülâyim bt. Abdullah nâm câriye-i memlûkemi târih-i kitâbdan yedi gün mukaddem mülkümden ibâk etmişiken hâlâ zâbit-i merkūm yedinde bulmuşdun suâl olunup alıverilmek matlûbumdur, deyicek gıbbe’s-suâl zâbit-i merkūm ibkā-i mevsûfe-i mezkûreyi ahzını ikrâr, lâkin müdde‘iye-i mezbûreden müdde‘âsına mübeyyine beyyine taleb olundukda, udûl-i ricâlden mahalle-i mezbûrede sâkin Halil Beşe b. Ali ve Mustafa Beşe b. Bâli nâm kimesneler li ecli’ş-şehâde makām-ı kazâya hâzırân olup istişhâd olunduklarında, fi’l-hakīka işbu câriye-i mevsûfe mezbûrenin mülk-i müşterâsı olup târih-i kitâbdan yedi gün mukaddem mülkünden ibâk eylediği ma‘lûmumuzdur mezbûr husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eyledikde ba‘de’t-ta‘dîl ve’t-tezkiyye şehâdetleri [10b] makbûle oldukdan sonra müdde‘iye-i mezbûre Şâkire’ye câriye-i mezkûreyi târih-i merkūmdan mukaddem bey‘ veya âhara hibe ve taraf-ı şer‘iyyeden böyle mülkünden ihrâc etmediğine yemîn teklîf olundukda, ol dahi alâ vefki’l-mes’ûl yemîn billâhi te‘âlâ etmeğin mûcebiyle câriye-i merkūmeyi sâhibesi müdde‘iye-i merkūmeye teslîme zâbit-i merkūma tenbîh-i şer‘î olunup mâ hüve’l-vâki‘ kayd şüd. Fi’l-yevmi’s-sâbi‘ aşer min Recebi’l-ferd li sene isneteyn ve seb‘în ve elf. Şuhûdü’l-hâl: Ahmed Ağa b. Sadi, Ömer Ağa b. Halil, Hüseyin Çelebi b. Tayyib, Mehmed Muhzır ve gayruhüm mine’l-hâzırîn.