Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 86 Hüküm no: 51 Orijinal metin no: [11b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyüb’den Ayşe bt. Süleyman’ın evini Raziye bt. Abdullah’a satması Medîne-i Hazret-i Ebâ Eyyûb-i Ensârî -dâme fî rıdvâni’l-Bârî-’de vâki‘ merhûm Veli Baba mahallesi sâkinelerinden Ayşe bt. Süleyman nâm hâtun meclis-i şerî‘at-ı şerîfede işbu râfi‘atü’l-vesîka Râziye bt. Abdullah nâm hâtun mahzarında bi tav‘ihâ ikrâr ve takrîr-i kelâm edip bey‘-i âti’z-zikrin sudûruna değin silk-i mülk-i sahîhimde münselik olan emlâkimden olup mahalle-i mezbûrede vâki‘ bir tarafdan yine kendi mülküm ve bir tarafdan Şerbetçi Osman Çelebi ve bir tarafdan dere ve taraf-ı âharı tarîk-i âm ile mahdûd olup bir bâb fevkānî ve bir bâb tahtânî odaları ve eşcâr-ı müsmire ve gayr-ı müsmire bahçeyi ve kenîfi müştemil mülk menzilimi cemî‘ tevâbi‘ ve levâhıkı ile mezbûre Râziye Hâtun’a iki bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm edip ol dahi minvâl-i muharrer üzre iştirâ ve tesellüm ve kabz ve kabûl eyleyip semeni olan mezbûrü’n-na‘t iki bin akçeyi mezbûre Râziye Hâtun yedinden tamamen alıp kabz eyledim ba‘de’l-yevm sâlifü’z-zikr menzil-i mahdûd-ı mezkûrda benim vechen mine’l-vücûhi’ş-şer‘iyye alâka ve medhalim yokdur. Mezbûre Râziye Hâtun’un mülk-i müşterâsıdır, keyfe mâ yeşâ’ mutasarrıfe olsun deyicek mukırra-i merkūmenin vech-i muharrer üzre cârî ve sâdır olan ikrârını mezbûre Râziye Hâtun vicâhen ve şifâhen tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-ışrîn min şehri Recebi’l-ferd li sene isneteyn ve seb‘în ve elf. Şuhûdü’l-hâl: Abdullah Halîfe b. Abdullah, Ahmed Beşe b. Hasan, Musli Dede b. Sefer, Mehmed Çelebi b. Ahmed ve gayruhüm mine’l-hâzırîn.