Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 86 Hüküm no: 52 Orijinal metin no: [12a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Samatyano v. Sivastos’un evini istiğlâl yoluyla Mahmud Çelebi Vakfı’nın mütevellisi Abdullah Çelebi’ye sattığı Mahmiye-i İstanbul mahallâtından Çakır Ağa mahallesi sâkinlerinden Samatyano v. Sivastos nâm zimmî mahfil-i kazâda medîne-i Hazret-i Ebâ Eyyûb-i Ensârî -dâme fî rıdvâni’l-Bârî-’de vâki‘ merhûm Mahmud Çelebi vakfı’nın nukūduna hâlâ kāim-i mütevellî Abdullah Çelebi b. Mustafa nâm kimesne mahzarında ikrâr ve takrîr-i kelâm edip silk-i mülk-i sahîhimde münselik olan emlâkimden olup mahalle-i mezbûrede vâki‘ bir tarafı Erine nâm nasrâniye mülkü ve bir tarafı diğer Erine bt. Yani mülkü ve tarafeynden Palasa nâm nasrâniye ve tarîk-i âm ile mahdûd ve mümtâz olan mülk menzilimi cümle tevâbi‘ ve levâhıkı ile kāimmakām -ı mezbûr Abdullah Çelebi’ye alâ tarîki’l-istiğlâl on iki buçuk kıt‘a riyâlî bin guruşa bey‘ ve teslîm edip ol dahi ol vakf-ı mezbûr ile tarîk-i merkūm üzre iştirâ ve tesellüm ve kabz ve kabûl ve semeni olan meblağ-ı mezbûr on iki buçuk kıt‘a riyâlî kebîr guruşu mezbûr Abdullah Çelebi yedinden tamamen alıp kabz eyledikde yine menzil-i mahdûd-ı mezbûru ba‘de’t-tahliyyeti’ş-şer‘iyye târih-i kitâbdan bir sene tamâmına değin yüz elli akçe ücret ile bana îcâr ve teslîm edip ben dahi vech-i meşrûh üzre istîcâr ve tesellüm ve kabz ve kabûl eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min şehri Recebi’l-ferd li sene isneteyn ve seb‘în ve elf. Şuhûdü’l-hâl: İlmüddin Efendi el-İmâm, İbrahim Efendi b. Hasan, Hasan Efendi b. Yusuf, çukadâr Mehmed Çelebi b. Ahmed, Hüseyin Çelebi b. Ali ve gayruhüm mine’l-hâzırîn.