Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 87 Hüküm no: 53 Orijinal metin no: [12a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Yani’nin Mizistreli Yorgi v. Yani’ye olan borcunu vârislerinin ödemesi Vilâyet-i Rumeli’nde Mizistre kazâsı a‘mâlinden Lonika nâm karye zimmîlerinden iken bundan akdem hâlik olan Yorgi v. Yani nâm zimmînin verâseti, sulbiye-i sagīre kızı Oşarda? nâm nasrâniye ile li ebeveyn er karındaşı Panayot nâm zimmîye münhasıra olduğu şer‘an zâhir ve müte‘ayyin oldukdan sonra merkūm Panayot’u kendi tarafından asâleten ve sagīre-i mezbûrenin tesviye-i umûru için kıbel-i şer‘den mansûb vasî olmağla vesâyeten meclis-i şer‘de yine kazâ-i mezbûre iktâ‘ından Çeçe nâm karyede sâkin iken bundan akdem hâlik olan Dimo v. Yani nâm zimmînin verâseti, sulbî kebîr oğulları Kosta ve Nikola ve Yorgi nâm zimmîler ile sulbiye-i kebîre kızları Kali ve Elani nâm nasrâniyelere münhasıra olduğu zâhir ve mütehakkik oldukdan sonra mezbûrân Kosta ve Nikola kendi taraflarından asâleten ve karındaşları mezbûretân taraflarından ikrâr-ı âti’z-zikri tasdîke vekîl-i şer‘îleri olmağla vekâleten ve mezbûr Yorgi dahi asâleten hâzırûn oldukları hâlde muvâcehelerinde bi’l-asâle ve bi’l-vesâya ikrâr ve takrîr-i kelâm edip mûrisim hâlik-i merkūm Yorgi’nin mürd-i mesfûr Dimo zimmetinde cihet-i deyn-i şer‘îden yüz elli kıt‘a riyâlî guruş hakkı olup kable’l-ahz ve’l-edâ ikisi dahi hâlik olmağla meblağ-ı mezbûr bi’l-irsi’ş-şer‘î sulbiye kızı sagīre-i mezbûre ile bana isâbet ve intikāl etmeğin ben dahi mârrü’z-zikr yüz iki guruş mürd-i mersûm Dimo’nun bi’l-inhisâr vârisleri olan mesfûrûn Kosta ve Niko ve Yorgi ve mersûmetân Kali ve Elani’den taleb ve bi’l-asâle ve bi’l-vesâye da‘vâ eyledikde anlar dahi ikrâr ve meblağ-ı mezbûru tamamen bana def‘ ve teslîm ben dahi asâleten ve vesâyetim hasebiyle mârrü’z-zikr yüz iki kıt‘a riyâlî guruşu alıp kabz edip husûs-ı mezbûra müte‘allik cemî‘ de‘âvî ve mütâlebât ve eymân ve muhâsamâtdan zimmetlerini asâleten ve vesâyeten ibrâ ve iskāt eyledim dedikde gıbbe’t-tasdîki’l-mu‘teber mâ hüve’l-vâki‘ bi’l-ibtigā ketb ve imlâ olundu. Fi’l-yevmi’l-ışrîn min şehri Recebi’l-ferd li sene isneteyn ve seb‘în ve elf. Şuhûdü’l-hâl: Mehmed Beşe b. Abdullah, Mustafa Beşe b. Abdullah, Ali Beşe b. Abdullah, Hüdâverdi b. Ali, Hüseyin Muhzır Ser-bölük, Todori Arnavud, Papa Laskari, Papa Dimitri, Papa Panayoti, Tanaş [v.] Andriye Yorgi, Kosta [v.] Apostol ve gayruhüm mine’l-hâzırîn.