Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 92 Hüküm no: 59 Orijinal metin no: [12(2)b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa b. Ramazan’ın Ayşe bt. Mahmud’a iftira ettiği Medîne-i hazreti Ebâ Eyyûb el-Ensârî -dâme fî rıdvâni’l-Bârî-’de vâki‘ Fethi Çelebi mahallesinde müezzin olan Ahmed Çelebi b. Mehmed nâm kimesnenin zevcesi râfi‘atü’l-vesîka Ayşe bt. Mahmud nâm hâtuna meclis-i şer‘de yine mahalle-i mezbûre sâkinelerinden Musa b. Ramazan nâm kimesne mahzarında üzerine takrîr-i da‘vâ edip mezbûr Musa gıyâbımda benim için mezbûr Müezzin Ahmed Çelebi hamama gittikçe beni mezbûre Ayşe içeri alıp benim ile mu‘âmele üzredir merkūme Ayşe ile bu vech üzre mu‘âmeledeyiz deyû benim ırzımı hedm etmişdir suâl olunup mûceb-i şer‘iyyesi icrâ olunmak matlûbumdur dedikde gıbbe’s-suâl ve akībe’l-inkâr isre’l-istişhâd mahalle-i mezbûre sükkânından Halil Beşe b. Mehmed ve Süleyman b. Mahmud nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-hakīka mezbûr Musa merkūme Ayşe ile mu‘âmelem vardır. Zevci mezbûr Ahmed Çelebi hamama gittikçe beni menziline alıp benim ile mu‘âmele üzredir deyû bizim huzûrumuzda ikrâr etmişdir biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde şehâdetleri hayyiz-i kabûlde vâki‘ olup mûceb-i şer‘îsi icrâ olundukdan sonra müdde‘iye-i mezbûre Ayşe Hâtun meclis-i şer‘de i‘âde-i kelâm edip keyfiyyet-i hâlim mahalle-i mezbûre ahâlîsinden istihbâr olunup haberleri tahrîr olunmak matlûbumdur deyicek mahalle-i mezbûre imâmı İbrahim Efendi b. Mustafa ve ahâlî-i mahalleden Mustafa Çelebi b. Abdülbâkī ve Mehmed Çelebi b. Mehmed ve el-Hâc Hasan b. Mehmed ve el-Hâc Hüseyin Bey b. Yusuf ve Mustafa Beşe b. Hanefi ve Sefer b. Hüseyin ve Hüseyin b. Veli nâm kimesneler li ecli’l-ihbâr meclis-i şer‘a hâzırûn olup istihbâr olunduklarında, fi’l-hakīka mezbûre Ayşe Hâtun kendi hâlinde ve mestûre hâtundur bu âna değin nâ-mahrem ile kat‘â alâkasına ve sâir hâline vukūfumuz yokdur deyû her biri mezbûre Ayşe Hâtun’un hüsn-i hâlini ihbâr ettiklerinde mâ hüve’l-vâki‘ alâ vukū‘ihî ketb olundu. Fi’l-yevmi’s-sâlis ve’l-ışrîn min şehri Recebi’l-ferd li sene isneteyn ve seb‘în ve elf. Şuhûdü’l-hâl: Kâtibü’l-hurûf Mehmed Efendi, Eyyûb Çelebi el-Mukayyid, Hamza Efendi nâib-i recül, Mehmed Çelebi Çukadâr, Mehmed b. Mehmed, Hüseyin Çelebi b. Ali ve gayruhüm mine’l-hâzırîn.