Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 285 Hüküm no: 318 Orijinal metin no: [40b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Ahmed’in ev eşyalarını kocası el-Hâc Ahmed b. Hüseyin’e hibe ettiği Mahmiye-i İstanbul’da Kabasakal mahallesinde sâkine Belkıs bt. Abdullah nâm hâtun tarafından husûs-ı âti’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân Mustafa Hoca b. Abdullah ve Receb Efendi b. İbrahim nâm kimesneler şehâdetleriyle şer‘an vekâleti sâbite olan Mehmed Efendi b. Ahmed nâm kimesne meclis-i şer‘de müvekkile-i mezbûrenin zevci işbu bâ‘isü’l-kitâb el-Hâc Ahmed b. Hüseyin nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Belkıs yedinde mülk ve hakkım olan eşyâsından beş beledî yastık ve iki minder ve bir beledî döşek ve iki yemeni yorgan ve üç beyaz çarşeb ve beş sahan ve bir tencere ve bir sof ferâce ve bir sof kablı sincab kürk ve iki alaca kaftan ve iki zıbın ve iki entari ve üç gömlek ve üç don mezbûr el-Hâc Ahmed’e hibe-i sahîha-i şer‘iyye ile hibe ve teslîm edip ol dahi meclis-i hibede ittihâb ve kabûl ve kabz ve tesellüm eyledi ba‘de’l-yevm eşyâ-i mezkûre merkūm Ahmed’in mülk-i mevhûbudur keyfe mâ yeşâ’ ve yahtâr mutasarrıf olsun dedi dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’l-hâmis ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Abdullah Çelebi b. Hasan el-Müezzin, sâ‘atçi Ebûbekir Ağa, Yusuf Çavuş, Mehmed Hoca, Mehmed Ağa b. Abdi, Abdi Çelebi, Edhem Çelebi, Hasan Çelebi.