Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 286 Hüküm no: 319 Orijinal metin no: [40b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in Receb b. Ramazan’dan satın aldığı câriyeyi iade isteğinin reddedildiği Mahmiye-i İstanbul’da Müftü Ali Çelebi mahallesinde sâkin işbu bâ‘isü’l-kitâb Receb b. Ramazan nâm kimesne meclis-i şer‘-i şerîf-i lâzımü’t-teşrîfde Fâtıma bt. Mehmed nâm hâtun muvâcehesinde takrîr-i kelâm edip işbu orta boylu, açık kaşlı, gök elâ gözlü Rûsiyyetü’l-asl Mevlüde nâm câriyemi cemî‘ uyûbdan sâlime olmak üzre târih-i kitâbdan bir sene mukaddem merkūme Fâtıma Hâtun’a doksan kıt‘a esedî guruşa bey‘ ve kabz-ı semen edip mezbûre Fâtıma dahi iştirâ ve tesellüm edip mevsûfe-i mezbûrede ayıbını görmeyip mesdûdü’d-dem olduğuna vâkıfe olup bir sene tamâmına değin istihdâm etmişiken ayb-ı mezbûra binâen câriye-i mezbûreyi red ederim deyû mu‘ârazadan hâlî değildir suâl olunup bî-vech mu‘ârazadan men‘ olunmak murâdımdır dedikde gıbbe’s-suâl mezbûre Fâtıma kaziyye minvâl-i muharrer üzre olduğunu ikrâr etmeğin mûcebince mezbûre Fâtıma bî-vech mu‘ârazadan men‘ olunup mâ vaka‘a bi’t-taleb ketb olundu. Hurrire fi’l-yevmi’r-râbi‘ ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Mehmed Bey b. Abdullah Kethüdâ-yı muhzırân, Baba Resul b. Rıdvan, Şükrullah Bey b. Mustafa, Hasan Çelebi b. Mehmed.