Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 98 Hüküm no: 65 Orijinal metin no: [14a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in evini Selâmi Mehmed Bey Mescidi Vakfı’na istiğlâl yoluyla satması Medîne-i hazreti Ebâ Eyyûb el-Ensârî -radiye anhu Rabbühü’l-Bârî-’de Aşçıbaşı mahallesinde sâkine Fâtıma bt. Mehmed nâm hâtun tarafından ikrâr-ı âti’z-zikre vekîl olup mezbûrenin zâtını ma‘rifet-i şer‘iyye ile ârifân olan Mehmed Çelebi b. Veli ve Davud Efendi b. Mehmed şehâdetleri ile şer‘an vekâleti sâbite olan zevci Ahmed Çelebi b. Mehmed meclis-i şer‘de medîne-i mezbûrede vâki‘ merhûm Selâmi Mehmed Bey Mescid-i Şerîfi evkāfı’na bi’l-fi‘l mütevellî olan bâ‘isü’l-kitâb Mustafa Çelebi b. Hüdâverdi mahzarında bi’l-vekâle ikrâr ve takrîr-i kelâm edip zevce-i müvekkile-i mezbûrenin silk-i mülk-i sahîhinde münselik olan emlâkinden mahalle-i mezbûrede vâki‘ bir tarafdan İsmail Çelebi mülkü ve bir tarafdan Mustafa Çelebi mülkü ve bir tarafdan imâma meşrûta olan vakf menzil ve bir tarafdan tarîk-i hâs ile mahdûd iki bâb fevkānî oda ve sofa ve bir tahtânî matbah ve sofa ve kiler ve bir ahır ve fevkinde bir oda dahi bir su kuyusu ve zât-ı eşcâr-ı müsmire ve gayrı müsmire bahçeyi müştemil mülk menzilini bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık müvekkilim zevcem mezbûre Fâtıma mâl-ı vakf-ı mezbûr ile mütevellî-i merkūma her biri yedişer dirhem gelir iki yüz kıt‘a riyâlî kebîr guruşu alâ tarîki’l-istiğlâl bey‘ ve teslîm edip ol dahi mâl-ı vakf-ı mezbûr ile tarîk-i merkūm üzre iştirâ ve kabûl edip semeni olan mezbûrü’n-na‘t iki yüz riyâlî guruşu müvekkilem mezbûre mütevellî ve mezbûr yedinden tamamen alıp kabz eylediğinden sonra menzil-i mahdûd-ı mezkûru mütevellî-i mezbûr Mustafa Çelebi ba‘de’t-tahliyye ve’t-takābuz târih-i kitâb şehri gurresinden sene tamâmına değin üç yüz akçe icâre ile zevcem müvekkile-i mezbûreye îcâr ve teslîm edip ol dahi vech-i muharrer üzre istîcâr ve tesellüm ve kabz ve kabûl eyledi dedikde gıbbe’t-tasdîki’ş-şer‘iyyi’l-mu‘teber derk-i menzil-i mahdûd-ı mezkûra ve ücret-i mersûmeye mukırr-ı mezbûr Ahmed Çelebi meclis-i mezbûrda emr ve kabûlü hâvî kefâlet-i sahîha-i şer‘iyye ile kefîl olmağın men lehü’t-tasdîk kıbelinden ba‘de’l-kabûl mâ cerâ bi’t-taleb ketb olundu. Fî gurreti Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Mehmed Çelebi b. Ahmed, Mahmud Çelebi b. Mehmed, Receb Bey Kethüdâ, Ali Çelebi kâtib-i vakf, Ahmed b. Ali, Hasan Çelebi Ser-bölük ve gayruhüm mine’l-hâzırîn.