Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 99 Hüküm no: 66 Orijinal metin no: [14a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Keyvan’ın Cafer Paşa Vakfı’na borçlu olması Medîne-i hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Cafer Paşa vakfı’nın nukūduna bi’l-fi‘l mütevellî olan Mehmed Çelebi b. Ahmed meclis-i şer‘de yine medîne-i mezbûrede Câmi‘-i Kebîr mahallesinde sâkin Mehmed Çelebi b. Keyvan mahzarında üzerine takrîr-i da‘vâ edip bundan akdem vakf-ı mezbûra sâbıkan mütevellî olan Halil Çelebi b. Hüdâverdi vakf-ı mezbûr malından otuz bir kıt‘a riyâlî kebîr guruş ile bir rub‘ guruş mezbûr Mehmed Çelebi üzerinde zimem gösterip mukābelesinde bir tarak alacası kaftan rehin olmak üzre bana def‘ ve teslîm, ben dahi kabz ve tesellüm eylemişimdir el-hâletü hâzihî vâki‘ hâl merkūm Mehmed Çelebi’den suâl olunup takrîri tahrîr olunmak matlûbumdur deyicek gıbbe’s-suâl mezbûr Mehmed Çelebi cevâbında fi’l-hakīka mütevellî-i sâbık Halil Çelebi yedinden vakf-ı mezbûr malından otuz bir kıt‘a riyâlî guruş ile bir rub‘ guruş istirbâh ve kabz edip mukābelesinde bir tarak alaca kaftanımı mezbûrun yedine vaz‘-ı rehin ve teslîm eylemiş idim, mârrü’z-zikr otuz bir guruş vakf-ı mezbûra deynimdir deyû bi tav‘ihî ikrâr ve i‘tirâf etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn li sene isneteyn ve seb‘în ve elf. Şuhûdü’l-hâl: Mustafa Çelebi b. Hüdâverdi, Veli Çelebi b. İsa, Mustafa Çelebi b. Veli, câbî Mahmud Çelebi b. Hasan, Mustafa Çelebi b. Süleyman, Eyyûb Çelebi el-Mukayyid, Hüseyin Çelebi b. Hasan, Mehmed Çelebi Çukadâr ve gayruhüm mine’l-hâzırîn.