Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 99 Hüküm no: 67 Orijinal metin no: [14b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Hacı Hüseyin’in Yorgo v. bakkal dükkânını işletmekten kaçan Eskoli’deki alacağını tahsil etmesi Mahmiye-i İstanbul’da hısnı ebvâbından Topkapısı dâhilinde Bayezid Ağa mahallesi sâkinlerinden Ahmed Bey b. el-Hâc Hüseyin nâm kimesne meclis-i şer‘-i şerîfde Havâss-ı Aliyye kazâsı a‘mâlinden Cuhûd Burgaz nâm karyede sâkin râfi‘ü’l-vesîka Yorgo v. Kiryaki nâm zimmî muvâcehesinde üzerine da‘vâ ve takrîr-i kelâm [edip] bundan akdem mahalle-i mezbûrede vâki‘ mülk bakkal dükkânımda bakkal iken firâr ve gaybet-i münkatı‘ ile gāib olan Eskoli nâm zimmî zimmetinde, cihet-i sermâyeden yirmi bin akçe ve dükkân kirâsından dahi yedi bin akçe ki cem‘an yirmi yedi bin akçemi bana edâ ve teslîme merkūm Eskoli’nin karındaşı merkūm Yorgo kefîl olmağla ben dahi meblağ-ı mezbûru ve beher kantarı ikişer yüz yetmiş akçeye olmak üzre merkūm Eskoli yedinden müşterâ ve makbûz on altı kantar siyah üzüm bahâsından dahi dört bin üç yüz yirmi akçeyi mezbûr Yorgo’dan taleb ve da‘vâ eyledikde merkūm Yorgo kefâletini inkâr zikr olunan üzümü iştirâ eylediğini ikrâr, lâkin anı dahi def‘ eyledim deyicek beynimizde münâza‘ât-ı kesîre cereyân etmiş idi el-hâletü hâzihî beynimizde muslihûn tavassut edip da‘vâ-yı mezkûrumdan mersûm Yorgo ile beni dört bin fıddî nakd-i râyic fi’l-vakt akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan mezbûrü’n-nakd dört bin akçeyi tamamen merkūm Yorgo yedinden alıp kabz edip da‘vâ-yı mezkûrumdan mesfûr Yorgo’nun zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d merkūm Yorgo ile vechen mine’l-vücûh da‘vâ ve nizâ‘ım yokdur dedikde mâ vaka‘a kayd şüd. Fî selhi şehri Recebi’l-ferd li sene isneteyn ve seb‘în ve elf. Şuhûdü’l-hâl: Dilâver b. Abdullah, Hüseyin b. Ali, el-Hâc Mustafa b. Abdullah, el-Hâc Hüseyin b. Hasan.