Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 100 Hüküm no: 68 Orijinal metin no: [14b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman, Rıdvan ve Reftar’ın menzillerini Cafer Paşa Evkafı’na istiğlâl yoluyla satması Medîne-i Ebâ Eyyûb el-Ensârî -dâme fî rıdvâni’l-Bârî-’de Bıçakçı Ferhad mahallesinde sâkin Süleyman b. Abdullah ve Rıdvan b. Abdullah ve zevcesi Reftar bt. Abdullah mahfil-i şer‘de yine medîne-i mezbûrede vâki‘ merhûm Cafer Paşa evkāfı’na bi’l-fi‘l mütevellî olan Mehmed Çelebi b. Ahmed mahzarında her biri ikrâr ve takrîr-i kelâm edip silk-i mülk-i sahîhimde münselik olan emlâkimizden mahalle-i mezbûrede vâki‘ iki tarafdan mevkūfâtî Mehmed Efendi merhûm mülkü ve iki tarafdan Defterdâr Mehmed Efendi merhûm veresesi mülkü ve tarîk-i âm ile mahdûd ale’l-iştirâk mülkümüz olan menzili, cemî‘ tevâbi‘ ve levâhıkı ve âmme-i menâfi‘ ve merâfıkı ile mütevellî mezbûr her biri sekiz dirhem gelir yüz yirmi kıt‘a riyâlî guruşa alâ tarîki’l-istiğlâl her biri bey‘ ve teslîm eyledikde ol dahi mâl-ı vakf-ı mezbûr ile tarîk-i merkūm üzre iştirâ ve kabûl eylediğimizden sonra semeni olan meblağ-ı mezbûr yüz yirmi kıt‘a riyâlî guruşu tamamen mütevellî-i mezbûr yedinden alıp kabz eylediğimizden sonra yine menzil-i mahdûd-ı mezkûru mütevellî-i mezbûr ba‘de’t-tahliyye ve’t-tekābuz târih-i kitâb şehri gurresinden sene tamâmına değin iki bin yüz altmış akçe icâre ile yine bize îcâr ve teslîm edip biz dahi ber minvâl-i muharrer iştirâ ve tesellüm ve kabz ve kabûl ve her birimiz âhar zimmetine lâzım gelen malın asıl ve fer‘ine emr ve kabûlü hâviye kefâlet-i sahîha-i şer‘iyye ile kefîl olduk dediklerinde mütevellî-i mezbûr dahi mezbûrûnu kelimâtlarında vicâhen tasdîk ve kefâletlerini dahi kabûl etmeğin mâ hüve’l-vâki‘ bi’t-taleb ketb olundu. Fî selhi şehri Recebi’l-ferd li sene isneteyn ve seb‘în ve elf. Şuhûdü’l-hâl: Mustafa Çelebi nâzır-ı vakf-ı mezbûr, Ahmed Ağa b. İslâm eş-şehîr bi Bağdâdî, Mustafa Çelebi b. Pervâne, Mehmed Çelebi b. Ahmed el-Câbî ve gayruhüm mine’l-hâzırîn.