Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 101 Hüküm no: 69 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vargo v. Manol’ün miras davasında Kiryako bt. Panayot ve Foti bt. Riga ile sulh olmaları Havâss-ı Aliyye kazâsı a‘mâlinden Cuhûd Burgaz nâm karyede sâkin iken bundan akdem hâlik olan Yani v. Riga nâm nasrâniyenin verâseti, vâlidesi Kiryako bt. Panayot ile li ebeveyn kız karındaşı Foti bt. Riga nâm nasrâniyeye usûbe-i nesebiyye cihetinden ibn-i ammi Vargo v. Manol nâm zimmîye münhasıra olduğu şer‘an zâhir ve müte‘ayyin oldukdan sonra merkūm Vargo mahfil-i kazâda kendi tarafından asîl ve sadriye kebîr kızı mezbûre Foti tarafından ikrâr-ı âti’z-zikri tasdîke vekîl olup Hamza Efendi el-Kadı ...? b. Abdullah şehâdetleriyle şer‘an vekâleti sâbite olan râfi‘atü’l-vesîka merkūm Kiryako muvâcehesinde ikrâr ve takrîr-i kelâm edip mûrisimiz hâlik-i mezbûrun karye-i mezbûrede vâki‘ lede’l-ahâlî ve’l-cîrân ma‘lûmetü’l-hudûd menzilde olan hisse-i mu‘ayyenesinden ve vâlidesi mezbûre beyninde mazbûta olan bir kebîr kazgan ve sâir muhallefâtından hisse-i şer‘iyyemi taleb eylediğimde vâlidesi ve hemşîresi merkūmetâna ekser eşyâmı ketm ile cevâb verdiklerinde beynimizde münâza‘ât-ı kesîre cereyân etmiş idi el-hâletü hâzihî beynimizde muslihûn tavassut edip merkūmetân nasrâniyeler ile beni mevâni‘den ârî sıhhat-i şerâit-i sulh-i hâvî tehârüc-i şer‘î vechi üzre iki bin iki yüz nakd-i râyic fi’l-vakt akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan mezbûrü’n-na‘t iki bin iki yüz akçeyi merkūmetân nasrâniyeler yedinden tamamen alıp kabz edip hâlik-i mezbûrun kalîl ve kesîr ve celîl ve hakīr ism-i mâl ıtlâk olunur bana âid olan hisse-i şer‘iyyem da‘vâsından mezbûretânın zimmetlerini ibrâ ve iskāt eyledim dedikde gıbbe’t-tasdîki’l-mu‘teber mâ hüve’l-vâki‘ [bi’t-taleb] ketb olundu. Fi’l-yevmi’r-râbi‘ min şehri Recebi’l-ferd li sene isneteyn ve seb‘în ve elf. Şuhûdü’l-hâl: Receb Bey Kethüdâ, Mehmed Beşe Çukadâr, Sâlih Mehmed Efendi b. Mehmed, el-Hâc İbrahim Ser-bölük-i râh-ı âbiyân, Hüseyin Muhzır ve gayruhüm mine’l-hâzırîn.