Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 102 Hüküm no: 70 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Yorgi’nin bağ ve arsasını Yamandi v. Todoş’a satması Havâss-ı Aliyye kazâsı aktâ‘ından kasaba-i Hasköy’de Kiremitçi Ahmed Çelebi mahallesi sâkinlerinden Yani v. Yorgi nâm zimmî meclis-i şer‘de işbu râfi‘ü’s-sifr kıdvetü milleti’l-Mesîhiyye Yamandi v. Todoş muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden kasaba-i mezbûre dâhilinde vâki‘ Okmeydanı kurbunda bir tarafdan Küçük Keretsi Mihaylo bağı ve bir tarafdan Lenardo bağı ve bir tarafdan arsa-i hâliye ve bir tarafdan Yamandi bağı ile mahdûd tahmînen beş dönüm bir kıt‘a bağımı ve kurbunda olan arsa-i hâliyemi ki merhûm ve mağfûrun-leh Sultan Bayezid Hân-ı Velî evkāfı’na senede yüz akçe mukāta‘ası vardır, cemî‘ tevâbi‘ ve levâhıkı ile merhûm Yamandi’ye iki bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm edip ol dahi ber minvâl-i muharrer iştirâ ve tesellüm ve kabz ve kabûl edip semeni olan mezbûrü’n-na‘t iki bin akçeyi tamamen mersûm Yamandi yedinden alıp kabz eyledim ba‘de’l-yevm bağ-ı mahdûd-ı mezkûr ve kurbunda olan arsa-i hâliyede vechen mine’l-vücûh alâkam kalmadı. Senesinde vakf-ı mezbûra zikr olunan yüz akçe mukāta‘asını verip, bağ-ı mahdûd-ı mezkûr ve arsa-i hâliye-i merkūmeye keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ bi’l-ibtigā sebt olundu. Tahrîren fî selhi şehri Recebi’l-ferd li sene isneteyn ve seb‘în ve elf. Şuhûdü’l-hâl: Hüseyin Çelebi b. Ali, Mehmed b. Mahmud, Hüseyin b. Hasan, Bayram Sofu b. Mehmed, Mehmed Beşe Çukadâr ve Papa Mavridi v. Dimitri, Yorgo v. İstavranos, David [v.] Yamandi gayruhüm mine’l-hâzırîn.