Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 102 Hüküm no: 71 Orijinal metin no: [15a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni bt. Ramazan’ın evini kocası Mehmed Beşe b. Musa’ya bağışlaması Medîne-i hazreti Ebâ Eyyûb el-Ensârî -dâme fî rıdvâni’l-Bârî-’de vâki‘ Davud Ağa mahallesi sâkinlerinden Ümmühâni bt. Ramazan nâm hâtun tarafından akd-i âti’z-zikri ikrâra vekîl olup mezbûrenin zâtını ma‘rifet-i şer‘iyye ile ârifân olan Ahmed Çelebi b. Hüseyin ve Halil Beşe b. Yusuf şehâdetleri ile şer‘an vekâleti sâbite olan Ali Beşe b. Musa nâm vekîl meclis-i şer‘de müvekkile-i mezbûrenin zevci işbu râfi‘ü’l-kitâb Mehmed Beşe b. Kurd nâm kimesne mahzarında bi’l-vekâle ikrâr-ı tâmm ve takrîr-i kelâm edip müvekkile-i mezbûre Ümmühâni’nin silk-i mülk-i sahîhinde münselik olup mahalle-i mezbûrede vâki‘ bir tarafı mekābir-i müslimîn ve bir tarafı İsmihan Hâtun mülkü ve bir [tara]fı vakf menzil ve taraf-ı râbi‘i Ali Beşe mülkü ve tarîk-i hâs ile mahdûd üç bâb fevkānî odayı ve bir sofayı ve tahtında bir bâb tahtânî odayı ve bir ahırı ve mezbûr Ali Beşe ile müşterek su kuyusunu ve zât-ı eşcâr-ı müsmire ve gayrı müsmire bahçeyi ve kenîfi müştemil mülk menzilini cümle tevâbi‘ ve levâhıkı ile ba‘de’t-tahliyye zevci mezbûr Mehmed Beşe’ye hibe-i sahîha-i şer‘iyye [ile] hibe ve temlîk ve teslîm edip ol dahi meclis-i hibede minvâl-i muharrer üzre ittihâb ve temellük ve tesellüm ve kabz ve kabûl eyledi ba‘de’l-yevm menzil-i mahdûd-ı mezkûrda benim vechen alâka ve medhalim yokdur. Zevcim mezbûr Mehmed Beşe’nin mülk-i mevhûbudur, keyfe mâ yeşâ’ ve yahtâr mutasarrıf olsun [15b] dedi deyû bi’l-vekâle ikrâr etmeğin vekîl-i mezbûrun vech-i meşrûh üzre cârî ve sâdır olan ikrâr mezbûr Mehmed Beşe vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Fî gurreti şehri Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hasan Efendi b. ( ) el-İmâm, Nasuh Halîfe b. İslâm el-Müezzin, Hasan Çelebi b. Mustafa, Şaban Çelebi b. Mustafa, Ahmed Çelebi b. Hüseyin, Mustafa Çelebi b. İsmail, Cafer Çelebi b. Abdullah, Hüseyin Çelebi b. Ali, çukadâr Mehmed Çelebi, Diğer Mehmed Çelebi b. Ahmed.