Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 103 Hüküm no: 72 Orijinal metin no: [15b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgo v. Petro’nun menzilini Manol v. Yano’ya satması Havâss-ı Aliyye kazâsına tâbi‘ Terkos nâhiyesinde vâki‘ Aya Yorgi nâm karye sükkânından Yorgo v. Petro nâm zimmî mahfil-i kazâda yine karye-i mezbûre sâkinlerinden işbu râfi‘ü’s-sifr Manol v. Yano nâm zimmî muvâcehesinde ikrâr ve takrîr-i kelâm edip silk-i mülk-i sahîhimde münselik olan emlâkimden karye-i mezbûrede vâki‘ bir tarafdan müşterî-i mezbûr Manol mülkü ve bir tarafdan Dimitri mülkü ve iki tarafdan tarîk-i âm ile mahdûd iki bâb fevkānî odayı ve tahtında iki kebîr bakkal dükkânı ve bir ahırı müştemil mülk menzilimi cümle tevâbi‘ ve levâhıkı ile mezbûr Manol zimmîye otuz iki bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm eylediğimde ol dahi minvâl-i muharrer üzre iştirâ ve tesellüm ve kabz ve kabûl eyleyip semeni olan mezbûrü’n-na‘t otuz iki bin akçeyi müşterî-i mezbûr Manol yedinden tamamen ahz ü kabz eyledim ba‘de’l-yevm sâlifü’z-zikr menzil-i mahdûd-ı mezkûrda benim vechen mine’l-vücûh alâka ve medhalim yokdur. Müşterî-i mezbûr Manol’ün mülk-i müşterâsıdır, keyfe mâ yeşâ’ ve hasbe mâ yahtâr mutasarrıf olsun dedikde mukırr-ı mezbûr[un] vech-i mübeyyen üzre cârî ve sâdır olan ikrârını merkūm Manol vicâhen tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min şehri Recebi’l-ferd li sene isneteyn ve seb‘în ve elf. Şuhûdü’l-hâl: Kadri Çelebi el-kasab, el-Hâc Mehmed Çelebi b. Kadri, el-Hâc İbrahim el-kasab, Bayram Dede el-Muhzır ve gayruhüm mine’l-hâzırîn.