Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 104 Hüküm no: 73 Orijinal metin no: [15b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Franko v. Todori’nin mülkünün Despina bt. Yani’ye ait olduğu Havâss-ı Aliyye kazâsına tâbi‘ Terkos nâhiyesi a‘mâlinden Bahçe-i Belgrad nâm karye sâkinelerinden Despina bt. Yani nâm nasrâniye meclis-i şerî‘at-ı şerîfede yine karye-i mezbûrede sâkin Dimitri v. Yorgi nâm zimmî muvâcehesinde üzerine takrîr-i da‘vâ edip bundan akdem zevcim olup mürd olan Franko v. Todori nâm hâlikin metrûkâtından olup karye-i mezbûrede vâki‘ bir tarafdan Frenk bağı ve bir tarafdan Todori v. İstirati mülkü ve bir tarafdan tarîk-i âm ile mahdûd bir bâb oda ve bir mikdâr havluyu müştemil mülk menzilimi ba‘de helâkihî bi’l-irsi’ş-şer‘î bana ve sulbî sagīr oğluna isâbet ve intikāl etmek ile menzil-i mezbûrun cümlesi mülk-i mevrûsum iken mezbûr Dimitri ber vech-i şer‘î menzil-i mezbûru zabt ve tasarruf eder hâlâ suâl olunup kasr-ı yedine ve bana teslîme tenbîh olunmak matlûbumdur deyicek gıbbe’s-suâl Dimitri cevâbında menzil-i mahdûd-ı mezkûru târih-i kitâbdan bir sene mukaddem hâzır bi’l-meclis Üstüyan v. Nikola’nın mülkü olmak üzre üç bin yedi yüz akçeye bey‘ ve teslîm ve kabz-ı semen eylemişdir mülk-i müşterâm olmak üzre zabt ve tasarruf ederim deyû müdde‘iye-i mezbûrenin mülk-i mevrûsu olduğun inkâr ile cevâb vermeğin gıbbe’l-istintâk merkūm Üstüyan cevâbında ben fi’l-hakīka menzil-i mahdûd-ı mezkûru müdde‘iye-i mezbûrenin zevc-i âharı olup bundan akdem mürd olan Polihroni v. Aviro nâm zimmî benim mülkümdür deyû târih-i kitâbdan iki sene mukaddem bana devr ve dört bin akçeye bey‘ ve teslîm ve kabz-ı semen etmekle ben dahi mülküm olmak üzre mezbûr Dimitri’ye ber minvâl-i muharrer bey‘ ve teslîm ve kabz-ı semen eylemişimdir deyû müdde‘iye-i merkūme Despina’nın vech-i mübeyyen üzre mülk-i mevrûsu olduğunu ol dahi inkâr edicek müdde‘iye-i merkūmeden müdde‘âsını mübeyyine beyyine taleb olundukda, karye-i mezbûrede sâkin Franko v. Yani ve Paroş v. Andriye nâm zimmîler li ecli’ş-şehâde mahfil-i kazâya hâzırân olup istişhâd olunduklarında, fi’l-hakīka menzil-i mahdûd-ı mezkûr müdde‘iye-i mezbûrenin zevc-i evveli olan Franko v. Todori nâm zimmînin mülkü olup ba‘de helâkihî bi’l-irsi’ş-şer‘î müdde‘iye-i mezbûre ile sulbî sagīr oğlu Nikola’ya isâbet ve intikāl edip ba‘dehû oğlu mezbûr Nikola dahi hâlik olmağla müdde‘iye-i mezbûre hasren vârisi olmağla menzil-i mahdûd-ı mezkûr-ı mezbûrede olan hisse-i şer‘iyyesi dahi mezbûre Despina’ya isâbet ve intikāl etmeğin [16a] mecmû‘ menzil mezbûre Despina’nın mülk-i mevrûsudur. Biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra menzil-i mahdûd-ı mezbûru müdde‘iye-i merkūme zevc-i âharı olan Polihroni’ye bey‘ veyâ hibe ve yâhud taraf-ı şer‘iyyeden bir tarîkle mülkünden ihrâc etmediğine mezbûre Despina’ya yemîn teklîf olundukda, ol dahi alâ vefki’l-mes’ûl yemîn billâhi’llezî enzele’l-İncîle alâ İsâ -aleyhi’s-selâm- etmeğin mûcebiyle menzil-i mahdûd-ı mezkûru müdde‘iye-i merkūme Despina’ya teslîm ile mezbûr Dimitri’ye tenbîh-i şer‘î birle mâ cerâ bi’l-ibtigā sebt olundu. Fi’l-yevmi’t-tâsi‘ aşer min şehri Recebi’l-ferd li sene isneteyn ve seb‘în ve elf. Şuhûdü’l-hâl: İsmail Çelebi b. İbrahim, Ahmed Çelebi b. Mustafa, Hüseyin Çelebi b. Hasan, Dilâver Bey b. Abdullah ve gayruhüm mine’l-hâzırîn.