Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 105 Hüküm no: 74 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Musli’nin eski kocası Ebûbekir b. Ömer’den muhâlaa yoluyla boşanması Mahmiye-i İstanbul’da hısnı ebvâbından Topkapısı hâricinde İlyaszâde mahallesi sâkinelerinden Emine bt. Musli nâm hâtun meclis-i şer‘de zevc-i sâbıkı Ebûbekir [b.] Ömer mahzarında tav‘an ikrâr ve takrîr-i kelâm edip zevcim ile beynimizde şikāk vâki‘ olmağın zimmetinde mütekarrir olan dört bin akçe mehr-i müeccelimi yedinden ahz eyledikden sonra nafaka-i iddet-i mu‘ayyene ve me’ûnet-i süknâmdan fâriğa olmak üzre zevcim mezbûr Ebûbekir ile muhâla‘a eyleyip zimmetini ibrâ ve zevciyyete müte‘allik âmme-i de‘âvî ve mütâlebât ve eymân ve muhâsamâtdan ibrâ ve iskāt eylediğimden mâ‘adâ mezbûr Ebûbekir firâşından hâsıl olan ( ) nâm sagīr oğlumu dahi kendi rızâ ve hüsn-i ihtiyârım ile babası mezbûra teslîm eyledim ba‘de’l-yevm hıdâneye müte‘allik da‘vâdan dahi zevc-i sâbıkım mezbûr Ebûbekir’in zimmetini ibrâ eyledim deyicek mezbûr Ebûbekir dahi meclis-i mezbûrda ben dahi mezbûr ile minvâl-i muharrer üzre olan hul‘-ı mezbûru kabûl ve zimmetini ve zevciyyete müte‘allik de‘âvîden ibrâ eyledim deyû kelimât-ı meşrûhasını vicâhen tasdîk etmeğin mâ hüve’l-vâki‘ bi’t-taleb ketb olundu. Fî gurreti Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Mirza Çavuş b. Mustafa, Receb b. Ramazan, Mehmed Ali Halîfe el-İmâm, es-Seyyid Mehmed el-Cündî, Mehmed Çelebi b. Ahmed, Ebûbekir Dede el-Müezzin ve gayruhüm mine’l-hâzırîn.