Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 286 Hüküm no: 320 Orijinal metin no: [41a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîr Mehmed Beşe’nin kaçak kölesini bostancılardan olduğu gerekçesiyle hapisten çıkaran Bostancı Mustafa’nın kölenin değerini ödemesi gerektiği, kölenin değerinin tespiti zarureti Vilâyet-i Rumeli’nde kasaba-i Malkara ahâlîsinden bâ‘isü’l-kitâb Pîr Mehmed Beşe b. Hüseyin nâm kimesne meclis-i şer‘-i şerîfde hadâyik-i sultâniyeden Davud Paşa Bahçe bostancılarından Mustafa b. Sâlih nâm kimesne mahzarında üzerine da‘vâ ve takrîr-i kelâm edip orta boylu, elâ gözlü, açık sarı kaşlı, sarışın Rûsiyyü’l-asl Siyavuş b. Abdullah nâm abd-i memlûküm bundan akdem firâr ettiğinden sonra hâlâ mahmiye-i İstanbul’da kethüdâ yeri olan Sefer Paşazâde Mustafa Ağa ahz edip benim için hıfz üzre iken mezbûru Bostancı Mustafa mevsûf-ı mezbûr için bizim yoldaşlarımızdandır deyû mevsûf-ı mezbûru merkūm Mustafa Ağa’nın yedinden ahz ettikden sonra firâr etmişdir suâl olunup mevsûf-ı mezbûrun kıymeti olan yüz kırk esedî guruşun mezbûr Bostancı Mustafa’dan tazmîn olunup alıverilmesi matlûbumdur dedikde, gıbbe’s-suâl mezbûr Bostancı Mustafa cevâbında bostancılarımızdan birini merkūm Mustafa Ağa’nın hapsinde bulup almışdım deyip müdde‘î-i mezbûrun abd-i memlûkü mevsûf-ı mezbûru vech-i muharrer üzre ahzını inkâr edicek müdde‘î-i mezbûrdan müdde‘âsını mübeyyine beyyine taleb olundukda dergâh-ı âlî yeniçerilerinden yirmi yedinci sekbânlara mahsûs oda yoldaşlarından Mehmed Beşe b. Abdullah ve otuz ikinci sekbânlara mahsûs oda yoldaşlarından Ahmed Beşe b. Ahmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka abd-i âbık olmak üzre mezbûr Mustafa Ağa’nın bundan akdem hapsinde olan orta boylu, elâ gözlü, açık sarı kaşlı, sarışın Rûsiyyü’l-asl Siyavuş b. Abdullah nâm gulâm müdde‘î-i mezbûrun abd-i memlûkü olup mezbûr Bostancı Mustafa mevsûf-ı mezbûr için yoldaşlarımızdandır deyû müdde‘î-i mezbûrun abd-i memlûkü olan mevsûf-ı mezbûru merkūm Mustafa Ağa’nın yedinden ahz u kabz etmişidi, ba‘dehû mevsûf-ı mezbûr firâr etmekle kıymet-i şer‘iyyesini müdde‘î-i mezbûra zâmin olmak mezbûr Bostancı Mustafa, üzerine lâzımdır biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâllerini suâl için küttâb-ı mahkemeden mevlânâ Mehmed Efendi b. Abdülbâkī irsâl olunup ol dahi şâhidân-ı mezbûrânın sâkin oldukları mârrü’z-zikr odalara varıp ahâlîsinden Halil Odabaşı b. Durmuş ve Süleyman Beşe b. Ali ve Ahmed Beşe b. Mehmed ve Mustafa Beşe b. İbrahim ve Ali Beşe b. İbrahim ve Mustafa Beşe b. Ali ve odabaşı Ahmed Çelebi b. Mustafa ve İbrahim Beşe b. Ramazan ve Ramazan Beşe b. Hüseyin nâm kimesnelerden şâhidân-ı mezbûrânın keyfiyyet-i hâlleri suâl ettikde her biri şâhidân-ı mezbûrân için âdillerdir velev aleynâ makbûlü’ş-şehâdedirler deyû haber verdiklerinde mevlânâ-yı mezbûr mahallinde tahrîr ba‘dehû ma‘an irsâl olunan Şaban b. Mehmed ile meclis-i şer‘a gelip alâ vukū‘ihî inhâ ve takrîr edip bu vechile alenen ve ba‘dehû sırren ta‘dîl ve tezkiyye olunduklarından şehâdetleri makbûle olup mûceb-i şehâdetleri ile hükm olundukdan sonra müdde‘î-i mezbûrdan mevsûf-ı mezbûrun kıymetini beyyine-i uhrâ taleb olundukda ityân-ı beyyine için istimhâl etmekle mehl-i şer‘î ile imhâl olunmağın mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Emîrü’l-ümerâ’i’l-kirâm Defterdâr Mehmed Paşa, umdetü’l-eşbâh Çavuşbaşı İsmail Ağa, fahrü’l-akrân Muhzır Mustafa Ağa, Eyüb Ağa b. Ahmed, Şaban Ağa b. Süleyman.