Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 105 Hüküm no: 75 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun’un menzilini İsmail Beşe ile karısı Yasemin’e satması Mahmiye-i İstanbul’da Mi‘mâr Sinan mahallesi sâkinelerinden fahrü’l-muhadderât Fâtıma bt. ( ) nâm hâtun tarafından bey‘-i câ’i’z-zikri ikrâra vekîl olup mezbûre Fâtıma Hâtun’un zâtını ma‘rifet-i şer‘iyye ile ârifân olan Hüseyin Bey b. Osman ve Halil Beşe b. Ebûbekir nâm kimesneler şehâdetleri ile şer‘an vekâleti sâbite olan umdetü’l-a‘yân Mustafa Ağa b. Ali nâm vekîl meclis-i şer‘de müvekkile-i mezbûrenin mu‘takalarından râfi‘ayi’l-kitâb İsmail Beşe b. Abdullah kendi tarafından asâleten ve zevcesi Yasemin bt. Abdullah nâm hâtun tarafından ikrâr-ı âti’l-beyânı tasdîke vekîl olmağın vekâleten mahzarında bi’l-vekâle ikrâr ve takrîr-i kelâm edip müvekkile-i mezbûre Fâtıma Hâtun’un bundan akdem medîne-i hazreti Ebâ Eyyûb el-Ensârî -dâme fî rıdvâni’l-Bârî-’de İslâmbey mahallesinde sâkine iken vefât eden Gonca bt. Abdullah nâm hâtundan usûbet-i nesebiyye cihetinden müvekkile-i mezbûreye isâbet ve intikāl eden emlâkinden olup mahalle-i mezbûrda vâki‘ bir tarafdan Hatice Hâtun mülkü ve bir tarafdan yine vakıf odalar ve taraf-ı râbi‘i tarîk-i âm ile mahdûd bir bâb tahtânî odayı ve sofayı ve müşterek su kuyusu ve kenîfi müştemil mülk-i menzil-i mevrûsunu, bi cümle tevâbi‘ ve levâhıkı ile mezbûr İsmail Beşe ile zevcesi mezbûre Yasemin’e tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm, anlar dahi minvâl-i muharrer üzre ber vech-i iştirâk tesellüm ve kabz ve kabûl eyleyip semeni olan mezbûrü’n-na‘t dört bin akçeyi mezbûr İsmail Beşe ile mezbûre Yasemin yedlerinden tamamen alıp kabz edip ba‘de’l-yevm sâlifü’z-zikr menzil-i mahdûd-ı mezkûrda benim vechen mine’l-vücûhi’ş-şer‘iyye alâka ve medhalim yokdur. Mezbûr İsmail Beşe ile zevcesi merkūme Yasemin Hâtun’un ale’l-iştirâk mülk-i müşterâları olmuşdur, keyfe mâ yeşâ’ân mutasarrıf ve mutasarrıfe olsunlar dedi deyû bi’l-vekâle ikrâr edicek vekîl-i mezbûrun vech-i mübeyyen üzre cârî ve sâdır olan ikrârını mezbûr İsmail Beşe asâleten ve vekâleten vicâhen ve şifâhen tasdîk ve tahkīk etmeğin mâ hüve’l-vâki‘ gıbbe’t-taleb ketb olundu. Fî gurreti şehri Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Şahbaz Bey b. Abdullah, Mustafa Beşe b. Yusuf, Mehmed Çelebi b. ( ) Kazganî, Hüseyin Çelebi b. ( ) el-Müezzin, Mehmed Çelebi b. Hasan, Hüseyin Çelebi b. Ali, Bayram Sofu b. Ahmed, Hüseyin Beşe b. Hasan, Mehmed Çelebi b. Ahmed, Dilâver Bey b. Abdullah ve gayruhüm mine’l-hâzırîn.