Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 106 Hüküm no: 76 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ahmed’in aldığı câriyenin hastalıklı çıkması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Kiremitçi Süleyman Çelebi mahallesi sâkinlerinden sâhibü’l-kitâb Mehmed Çelebi b. Ahmed nâm bevvâb-ı sultânî mahfil-i kazâda esirci tâifesinden Selim Beşe b. Ali nâm râcil mahzarında üzerine takrîr-i da‘vâ edip târih-i kitâbdan on altı gün mukaddem işbu hâzır bi’l-meclis Kalender nâm bikr câriye-i Rûsiyyetü’l-aslı merkūm Selim Beşe’den doksan iki aded esedî guruş ve yüz elli akçeye iştirâ ve kabz-ı semen eylediğinden sonra câriye-i mezbûrenin ayakları altında bevâsîr marazı olduğuna muttali‘ olup ayb-ı kadîm olmağın ile’l-ân kabûl etmeyip ve kabûle delâlet eder bir fi‘l dahi benden sâdır olmamışdır hâlâ reddolunup semeni olan mârrü’z-zikr doksan iki aded esedî guruş ile yüz elli akçenin alıverilmesi matlûbumdur deyicek gıbbe’s-suâl merkūm Selim Beşe cevâbında mârrü’z-zikr câriyemi müdde‘î-i mezbûra ber minvâl-i muharrer bey‘ ve kabz-ı semen eylediğini ikrâr, lâkin câriye-i mezkûrede red îcâb eder ayb-ı kadîm olduğunu inkâr edicek etıbbâya mürâca‘at olundukda, etıbbâ-i hâssadan olup emr-i pâdişâhî ve hükm-i şehinşâhî ile husûs-ı mezbûra memûr olan fahrü’l-etıbbâ’i’l-kirâm Mustafa Efendi ve Ahmed Efendi mahfil-i şer‘a hâzırân olup münkir-i mezbûr muvâcehesinde takrîr-i kelâm edip işbu câriyenin ayakları altında olan maraz on günde ve on beş günde hâdis olur uyûb kabîlinden olmayıp ancak yedi sekiz ayda peydâ olur, maraz-ı mezbûr beyne’l-etıbbâ kızıl yel demekle ma‘rûfdur, ayb-ı kadîmdir deyû her biri haber verdiklerinde müdde‘î-i mezbûr câriye-i mezkûrenin aybına vâkıf oldukdan sonra kabûl ve marazına devâ ve ilâc etmeyip kabûlüne delâlet eder bir fi‘l sâdır olmadığına müdde‘â-aleyh talebiyle teklîf olundukda, ol dahi alâ vefki’l-mes’ûl yemîn billâhi te‘âlâ etmeğin mûcebiyle ba‘de’l-hükm mâ hüve’l-vâki‘ bi’t-taleb ketb olundu. Fî gurreti Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Abdurrahman Efendi b. Cafer Paşa, el-Hâc İbrahim b. Ahmed, Ebûbekir Dede b. ( ) el-Müezzin, Yusuf Halîfe el-Mu‘allim, Ahmed Çelebi b. Mehmed ve gayruhüm mine’l-hâzırîn.