Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 111 Hüküm no: 81 Orijinal metin no: [18a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zir v. Yani’nin bağını İstati v. İstamo’ya satması Vilâyet-i Rûmili’nde Badracık kazâsı a‘mâlinden Ruyalo? nâm karye zimmîlerinden Zir v. Yani nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-vesîka İstati v. İstamo nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden karye-i mezbûre sınırı dâhilinde vâki‘ bir tarafdan karındaşım Dimo bağı ve bir tarafdan Kara Yani bağı ve bir tarafdan diğer Yani v. İstamo bağı ve bir tarafdan tarîk-i âm ile mahdûd bir kıt‘a mülk bağımı bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık merkūm İstati’ye yedi yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i kat‘î ile bâtten bey‘ edip ol dahi vech-i muharrer üzre iştirâ ve kabûl edip semeni olan mezbûrü’n-na‘t yedi yüz akçeyi tamamen merkūm İstati yedinden alıp kabz edip bağ-ı mahdûd-ı mezkûru mahallinde zabt ve tasarrufa tarafımdan merkūm İstati’yi taslît eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Tahrîren Fi’l-yevmi’s-sâbi‘ min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hüseyin b. ( ) Muhzır, Bayram Sofu el-Muhzır, Dilâver el-Muhzır, Mehmed Beşe Çukadâr ve gayruhüm mine’l-hâzırîn.