Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 111 Hüküm no: 82 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Ömer’in Şaban b. Abdullah ile fuhuş yaparken kocası tarafından yakalandığı Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Bıçakçı Ferhad mahallesinden Süleyman Beşe b. Hüseyin nâm Râcil, hâlâ medîne-i mezbûre zâbiti Ali Çavuş mübâşeretiyle Şaban b. Abdullah nâm hâssa aşçıyı meclis-i şer‘a ihzâr ve mahzarında üzerine takrîr-i da‘vâ edip mezbûr Şaban işbu târih-i kitâb günü zevce-i menkûham hâzıre bi’l-meclis Emine bt. Ömer ile mahalle-i mezbûrede vâki‘ menzilimde oda içinde bir döşekde yatıp, mu‘âmele-i fâhişe ederlerken üzerlerine gelip hücûm ve ümmet-i Muhammed deyû feryâd eylediğimde ba‘zı müslümanlar gelip bana mu‘âvenet etmekle mezbûru ahz ve ihzâr-ı şer‘ eylemişimdir suâl olunup ihkāk-ı hak olunmak matlûbumdur deyicek gıbbe’s-suâl mezbûr Şaban ve mezbûre Emine husûs-ı mezbûru bi’l-külliyye inkâr ile cevâb vermeğin müdde‘î-i mezbûrdan müdde‘âsını mübeyyine beyyine taleb olundukda udûl-i ricâlden Beşir Bey b. Ahmed ve Mehmed Beşe b. Yusuf nâm kimesneler li ecli’ş-şehâde makām-ı kazâya hâzırân olup istişhâd olunduklarında, fi’l-hakīka işbu târih-i kitâb günü müdde‘î-i mezbûrun menzilinde bir kavga ve feryâd istimâ‘ edip biz dahi komşu olmağla varıp mezbûr Şaban’ı müdde‘î-i mezbûr odası içinde ahza çalışır müşâhede ve mu‘âyene eyledik hattâ oda-i mezkûrenin yükü içinde döşek bırakılmış ve alâmât-ı fuhuş âşikârdurur müşâhede eylemişizdir müdde‘î-i mezbûr merkūm Şaban’ı kendi odası içinde zevcesiyle ma‘an bir yerde bulup ahz eylemişdir husûs-ı mezbûra bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyet-i şerâiti’l-kabûl şehâdetleri makbûle olmağın mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Halil b. Hızır, Mehmed Ağa b. Mahmud, Hüseyin Beşe b. Mehmed, Osman b. Abdullah, Mustafa b. Ahmed, Hasan Bey b. Abbas ve gayruhüm mine’l-hâzırîn.