Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 112 Hüküm no: 83 Orijinal metin no: [18a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Afîfe Hatun bt. Eminzâde Mustafa Ağa’nın evini Mehmed Çelebi b. Ali’ye satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Defterdâr Mahmud Efendi mahallesi sâkinelerinden fahrü’l-muhadderât Afîfe Hâtun bt. el-merhûm Eminzâde Mustafa Ağa kıbelinden bey‘-i âti’z-zikre ve kabz-ı semeni ikrâra vekîl olup mezbûrenin zâtını ma‘rifet-i şer‘iyye ile ârifân olan fahrü’l-eimme Hasan Efendi b. Mansur ve Nasuh Efendi b. Abdüsselâm [şehâdetleri ile] vekâleti sâbite olan Müstedam Bey b. Abdullah nâm vekîl meclis-i şer‘-i şerîf-i lâzımü’t-tevkīrde işbu kitâb-ı sıhhat-nisâbın sâhibi fahrü’l-akrân Mehmed Çelebi b. Ali nâm râcil mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem müşârün-ileyhânın silk-i mülk-i sahîhinde münselik olan emlâkinden Davud Ağa mahallesinde vâki‘ iki tarafdan merhûm İbrahim Ağazâde Mustafa Bey mülkü ve bir tarafdan ba‘zan İbrahim Ağa merhûmun âhar oğlu mülkü ve ba‘zan Medîne-i Münevvere vakfı ve bir tarafdan tarîk-i âm ile mahdûd iki bâb tahtânî ve bir bâb fevkānî odaları ve bir sofa ve bir su kuyusu ve kenîfi ve zât-ı eşcâr-ı müsmire ve gayrı müsmire bahçeyi müştemil mülk menzilini bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mehmed Çelebi’ye altmış dört bin fıddî nakd-i râyic fi’l-vakt akçeye bâtten bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t altmış dört bin akçeyi tamamen müşterî-i mezbûr Mehmed Çelebi yedinden tamamen müvekkilem müşârün-ileyhâ alıp kabz edip menzil-i mahdûd-ı mezkûrda vechen mine’l-vücûh ve sebeben mine’l-esbâb [18b] alâka ve medhalim yokdur. Ba‘de’l-yevm müşterî-i merkūm Mehmed Çelebi’nin mülk-i müşterâsı ve hakk-ı sarîhidir, keyfe mâ yeşâ’ mutasarrıf olsun dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Mehmed Çelebi b. Ali …?, Hasan Çelebi b. Mustafa, Şaban b. Mustafa, Receb Halîfe b. Maden, Hüseyin Bey el-Cündî, Şaban Çelebi b. Mehmed, Mehmed b. Mehmed, Hüseyin Muhzır, Hamza Efendi nâib-i recül ve gayruhüm mine’l-hâzırîn.