Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 113 Hüküm no: 84 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mano v. Mato’nun evini Yorgi v. Hristo’ya satması Vilâyet-i Rûmili’nde Bihilişte nâm kasaba sâkinlerinden Mano v. Mato nâm zimmî meclis-i şer‘de işbu hâmilü’l-vesîka Yorgi v. Hristo nâm zimmî muvâcehesinde ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkimden kasaba-i mezbûrede vâki‘ bir tarafdan bozacı Genco mülkü ve bir tarafdan Kino mülkü ve bir tarafdan Besko mülkü ve bir tarafdan tarîk-i âm ile mahdûd bir bâb tahtânî oda ve bir kiler ve bir ahır ve muhavvatayı müştemil mülk menzilimi bi cümleti’t-tevâbi‘ ve’l-levâhık merkūm Yorgi’ye dört bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ edip ol dahi vech-i muharrer üzre iştirâ ve kabûl edip semeni olan mezbûrü’n-na‘t dört bin akçeyi tamamen müşterî-i mezbûr yedinden ahz ü kabz edip menzil-i mahdûd-ı mezkûru mahallinde zabt ve tasarrufa tarafımdan merkūm Yorgi’yi taslît eyledim dedikde gıbbe’t-tasdîki’l-mu‘teber mâ cerâ bi’t-taleb ketb olundu. Fi’l-yevmi’s-sâbi‘ min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Zülfikar Bey b. Abdullah, Eyyûb Beşe b. Abdullah, Sava v. Yani, Kiro v. Panço ve gayruhüm mine’l-hâzırîn.