Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 288 Hüküm no: 321 Orijinal metin no: [41a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen İbrahim Ağa b. el-Hâc Mehmed Ağa’nın veraseti ile ilgili davanın sulhle sonuçlandığı Mahmiye-i İstanbul’da Hobyar mahallesinde sâkin iken bundan akdem vefât eden İbrahim Ağa b. el-Hâc Mehmed Ağa’nın verâseti kebîr oğulları Sâlih Ağa ve Ahmed Ağa ve Mustafa Ağa ve sagīr oğlu İsmail Çelebi ve kebîre kızı Râbia Hâtun’a münhasıra olduğu şer‘an sâbit ve mütehakkik oldukdan sonra mezbûrân Sâlih Ağa ve Ahmed Ağa kendi taraflarından asâleten ve mezbûr Sâlih Ağa merkūm Mustafa Ağa tarafından husûs-ı âti’l-beyâna vekîl olduğu Abbas Bey b. Abdullah ve Mustafa Dede b. Mehmed nâm kimesneler şehâdetleriyle şer‘an sâbit oldukdan sonra vekâleten sagīr-i mezbûrun kıbel-i şer‘-i enverden mansûb vasîsi olan Musli Ağa b. Ahmed nâm kimesne vesâyeten meclis-i şer‘-i şerîf-i Ahmedî ve mahfil-i dîn-i münîf-i Muhammedî’de müteveffâ-yı mezbûrun li ebeveyn kız karındaşı olup mahmiye-i mezbûrede Şeyh Resmî mahallesinde sâkine iken bundan akdem vefât eden Fâtıma Hâtun bt. Hacı Mehmed Ağa’nın li eb karındaşı ve hasren vârisi olup terekesine vâzı‘ü’l-yed olan râfi‘ü’l-kitâb Mustafa Çelebi nâm kimesne mahzarında her biri ikrâr ve takrîr-i kelâm edip müteveffât-ı mezbûre hayâtında müteveffâ-yı mezbûr İbrahim Ağa’nın terekesinden bi gayrı hakkın seksen beş bin akçe ve otuz bin akçe kıymetli bir mücevher ayna ahz u kabz etmiş idi deyû bundan akdem mezbûr Musli Çelebi’den taleb ve da‘vâ ettiğimizde mezbûr Mustafa Çelebi dahi mûrisem müteveffât-ı mezbûra meblağ-ı mezbûr ile zikr olunan aynayı bi hakkın almış idi deyû da‘vâ edip biz dahi inkâr ettiğimizde mezbûr Mustafa Çelebi müdde‘âsına şâhidleri olup müdde‘âsını isbât etmesi mukarrer olup sulh sagīr hakkında dahi enfa‘ olmağın beynimize muslihûn tavassut edip mezbûr Mustafa Çelebi ile beynimizde iki yüz kırk esedî guruş üzerine inşâ-i akd-i sulh ettiklerinde biz dahi sulh-i mezbûru kabûl ve bedel-i sulh-i mezkûru yedinden tamâmen ahz u kabz eyledik dediklerinde gıbbe’t-tasdîk mezbûr Sâlih Ağa asâleten ve vekâleten ve mezbûr Ahmed Ağa asâleten husûs-ı mezbûra müte‘allika âmme-i de‘âvîden mezbûr Mustafa Çelebi’yi ibrâ-i âmm-ı kātı‘ü’n-nizâ‘ ile ibrâ etmeğin mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sânî ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Mustafa Efendi b. Müstakīm el-İmâm, Mehmed Çelebi b. Ali, keşfî Mustafa Efendi b. Muharrem, Sarıyerli Emrullah Çelebi, Mustafa Çelebi el-Emîn, Ahmed Çelebi el-Kâtib ve gayruhüm.