Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 113 Hüküm no: 85 Orijinal metin no: [18b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamer Hatun Evkafı’na ait arsanın kullanım hakkının mukátaa yoluyla Ali Halife b. Handan’a devredildiği İşbu bâ‘isü’l-vesîka mefhar-i erbâbi’t-tahrîr ve’l-kalem Ali Halîfe b. Handan meclis-i şer‘de mahmiye-i İstanbul’da Elvanzâde mahallesinde vâki‘ merhûme Kamer Hâtun evkāfı’na bi’l-fi‘l mütevellî olan Mehmed Dede mahzarında takrîr-i kelâm ve ifâde-i merâm edip evkāf-ı mezbûreden olup icâre-i mu‘accele-i ma‘lûme ve ayda iki yüz altmış akçe ücret-i müeccele [ile] Avraham nâm yahudi’nin taht-ı icâresinde iken, işbu def‘a mahmiye-i mezbûrede vâki‘ olan harîk-i azîmde muhterik olan iki tarafdan ( ) ve iki tarafdan tarîk-i âm ile mahdûd mahzeni ve yahudihâne[si] muhterik olup eser-i binâdan bir şey kalmadığından mâ‘adâ tâife-i Yahud ol mahalde binâdan men‘ ve uhdelerinde olan arâzi ve emlâk müslimîne tefvîz ve bey‘ olunmak üzre fermân-ı şehriyârî vârid olmağın merkūm Avraham zikr olunan mahzen ve yahudihâne arsasından kasr-ı yed etmekle arsa-i merkūme müslimînden birine tefvîz[i] lâzım gelmeğin mütevellî-i mezbûr dahi arsa-i mezkûreyi tâliblerine arz edip mecma‘-ı nâs olan mevâzi‘de kirâren ve mirâren nidâ ve müzâyede olundukda bi’l-âhire arsa-i mezkûre senede sekiz yüz akçe mukāta‘a ve bin akçede benim üzerimde karâr edip ziyâde ile tâlib-i âhar zuhûr etmemeğin mütevellî-i mezbûr dahi arsa-i merkūmu vech-i muharrer üzre bana tefvîz ve üzerine malım ile nefsim için eylediğim binâ mülküm olmak üzre izin ve icâzet ve yedime işbu târih-i kitâb senesi şehri Recebi’l-müreccebi gurresiyle müverrah ve kendi imzâsıyla mümzâ ve hatmiyle mahtûm temessük verip, sâlifü’z-zikr bin akçeyi vakf-ı mezbûr için yedimden ahz ü kabz etmeğin ben dahi ber minvâl-i muharrer tefevvüz ve kabûl eylemişimdir el-hâletü hâzihî husûs-ı mezbûr mütevellî-i merkūmdan suâl ve yedime verdiği temessük mûcebince li ecli’l-istihkâm kıbel-i şer‘den dahi yedime hüccet-i şer‘iyye verilmek matlûbumdur deyû târih-i mezbûr ile müverrah ve mütevellî-i mezbûr imzâsıyla mümzâ ve hatmiyle mahtûm min külli’l-vücûh takrîrine muvâfık ve müdde‘âsını nâtık temessük ibrâz edip feth ve kırâat olundukdan sonra mütevellî-i mezbûr dahi suâl olundukda, fi’l-vâki‘ hâl minvâl-i muharrer üzre olmuşdur. İşbu temessük benimdir deyû ikrâr etmeğin cânib-i şerî‘at-ı mutahharadan dahi işbu vesîka [19a] istihkâmen ketb olundu. Fi’l-yevmi’s-sâdis min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: İlmüddin Efendi b. Süleyman, Mahmud Çavuş el-Attâr, Ramazan el-Attâr, İbrahim Çelebi el-Cündî, Musli Bey el-Cündî, Ali Çelebi Na‘tî, Musli Bey el-Muhtesib, Dilâver muhzır ve gayruhüm mine’l-hâzırîn.