Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 114 Hüküm no: 86 Orijinal metin no: [19a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Hüseyin’in Eyüb Vakfı’na ait yeni hamamı işleten Meryem bt. Mehmed’e borcu olduğu Medîne-i Hazret-i Ebâ Eyyûb el-Ensârî’de yine hazreti müşârün-ileyh evkāfından Yeni Hamam demekle ma‘rûf hamamın sâbıkan hamamcısı olan Meryem bt. Mehmed nâm hâtun tarafından husûs-ı âti’z-zikre vekîl olup şer‘î müsecceli olan bâ‘isetü’l-kitâb Mâhıcinân bt. Abdullah nâm hâtun meclis-i şer‘de müvekkilesi mezbûre Meryem Hâtun’un hamam-ı mezkûrda sâbıkan destgâhdârı olan Ahmed b. Hüseyin nâm kimesne mahzarında üzerine bi’l-vekâle takrîr-i da‘vâ edip müvekkilem mezbûre Meryem Hâtun bundan akdem evkāf-ı mezbûre mütevellîsi gāib ani’l-meclis Mehmed Efendi’den hamam-ı mezkûru icâre-i ma‘lûme ile istîcâr eylediğinde destgâhdârı mezbûr Ahmed müvekkilem mezbûre Meryem Hâtun’dan vakfın hamamcı-i sâbıka deyni vardır, hâlâ sen edâ eyle hamamın müddet-i icâresi tamâm oldukda edâ eylediğin meblağı mütevellîden alıp yine sana veririm deyû seksen sekiz aded sikke-i hasene ve yüz yirmi aded esedî ve elli aded riyâlî guruş ahz ü kabz eylemişdir hâlâ suâl olunup takrîri tahrîr olunmak bi’l-vekâle matlûbumdur deyicek mezbûr Ahmed cevâbında fi’l-hakīka hâl minvâl-i muharrer üzre olup lâkin müvekkile-i mezbûreden seksen sekiz aded sikke-i hasene ve yüz yirmi aded esedî guruş ve yirmi altı aded riyâlî guruş alıp emri üzre mütevellî-i vakf-ı mezbûra tamamen def‘ ve teslîm eylemişimdir deyû tav‘an ikrâr ve i‘tirâf etmeğin vâki‘ hâl vekîl-i mezbûr talebiyle ketb olundu. Fi’l-yevmi’s-sâmin min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Sâlih Efendi b. Mehmed, Hamza Efendi nâib-i recül, Hüseyin Beşe b. Ömer, Hüseyin muhzır ve gayruhüm mine’l-hâzırîn.