Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 115 Hüküm no: 87 Orijinal metin no: [19a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Göka’nın evini Koma Niko v. Liko’ya satması Vilâyet-i Rûmili’nde Ergirikasrı kazâsına tâbi‘ Senâgirpalo? nâm karye sâkinlerinden Dimo v. Göka nâm zimmî meclis-i şer‘de işbu râfi‘ü’l-vesîka Koma Niko v. Liko nâm zimmî muvâcehesinde ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkimden karye-i mezbûrede vâki‘ bir tarafdan Dimo Papas mülkü ve bir tarafdan merkūm Niko mülkü ve bir tarafdan Kirokom mülkü ve bir tarafdan vâdi ile mahdûd bir bâb tahtânî oda ve önünde mülk harman yerini ve bostanı müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık merkūm Koma Niko’ya on bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i kat‘î ile bâtten bey‘ edip ol dahi vech-i muharrer üzre iştirâ ve kabûl edip semeni olan mezbûrü’n-na‘t on bin akçeyi tamamen merkūm Koma Niko yedinden alıp kabz edip menzil-i mahdûd-ı mezkûru mahallinde zabt ve tasarrufa tarafımdan merkūm Koma Niko’yu taslît eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hüseyin Beşe b. Ali, Dilâver b. Abdullah, Mehmed b. Musli, Mehmed b. Mahmud ve gayruhüm mine’l-hâzırîn.