Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 116 Hüküm no: 88 Orijinal metin no: [19a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Palaş bt. Dimitri’nin ev, bahçe, çayır ve tarlalarını Süleyman Beşe b. Veli’ye satması Mahmiye-i İstanbul hısnı ebvâbından Fenerkapısı dâhilinde Abdi Subaşı mahallesi sâkinelerinden Palaş bt. Dimitri nâm nasrâniye meclis-i şer‘de işbu hâmilü’l-kitâb Süleyman Beşe b. Veli nâm gulâm-ı acemî nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden Galata kazâsı a‘mâlinden Tonuz deresi demekle ma‘rûf karyede vâki‘ bir tarafdan arsa-i hâliye ve tarafeyni Yorgo bağı ve menzili ve bir tarafdan tarîk-i âm ile mahdûd iki bâb fevkānî oda ve sundurma ve iki bâb tahtânî oda ve havluyu müştemil mülk menzilimi bi cümleti’t-tevâbi‘ ve’l-levâhık ve yine karye-i mezbûre bağları dâhilinde bir tarafdan mîrî bağ ve bir tarafdan yol ve bir tarafdan Andriye bağı ve bir tarafdan Karaca bağı ile mahdûd tahmînen sekiz dönüm bir kıt‘a mülk bağımı bi cümleti’l-hukūk ve’l-luhûk mezbûr Süleyman Beşe’ye on bir bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bi safkatin vâhidetin bâtten bey‘ ve teslîm edip ol dahi vech-i muharrer üzre iştirâ ve tesellüm [19b] ve kabz ve kabûl eyledikden sonra yine karye-i mezbûre sınırı dâhilinde vâki‘ merhûm mağfûrun-leh Şehzâde Sultan Mehmed Hân evkāfı arâzisinden olup tefvîz-i âti’z-zikrin sudûruna değin zabt ve taht-ı tasarrufumda olan arâziden lede’l-ahâlî ve’l-cîrân ma‘lûmetü’l-hudûd ve’l-cevânib on iki keyl tohum alır dört kıt‘a tarla ve bir kıt‘a çayırımın dahi hakk-ı tasarruflarını evkāf-ı mezbûre mütevellîsi ma‘rifetiyle merkūm Süleyman Beşe’ye iki bin altı yüz nakid akçe bedel mukābelesinde tefvîz bi’l-ferâğ eylediğimde ol dahi vech-i muharrer üzre tefevvüz ve kabûl edip semen-i mezbûr ile bedel-i merkūm ki cem‘an on üç bin altı yüz akçeyi tamamen müşterî-i mezbûr Süleyman Beşe yedinden alıp kabz eyledim ba‘de’l-yevm emlâk-i mezbûre merkūm Süleyman Beşe’nin mülk-i müşterâsı ve arâzi-i merkūme dahi dâhil-i taht-ı tasarrufu olmuşdur, keyfe mâ yeşâ’ mutasarrıf olsun dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hüseyin b. Ali, Ahmed Bey b. Ali el-Bakkal, Mustafa b. Mehmed Semerci, Ali Beşe b. Mehmed, Mehmed b. Abdullah, Mehmed b. İsa, Hüseyin Dede el-Halvetî ve gayruhüm mine’l-hâzırîn.