Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 116 Hüküm no: 89 Orijinal metin no: [19b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer Paşa Vakfı eski mütevellisinin vakfa borçlu olduğu Medîne-i hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Cafer Paşa[’nın] vakf eylediği nukūda hâlâ mütevellî olan hâmilü’l-kitâb Mehmed Çelebi b. Ahmed nâm bevvâb-ı sultânî meclis-i şer‘de sâbıkan vakf-ı mezbûra mütevellî olan Halil Çelebi b. Hüdâverdi mahzarında bi’l-velâye takrîr-i kelâm ve ifâde-i merâm edip mezbûr Halil Çelebi tevliyyet-i mezbûreden azl ve yerine ben mütevellî olduğumda nâzır-ı vakf-ı mezbûr hâkim-i muvakki‘-i sadr-ı kitâb hazretleri huzûrunda mütevellî-i sâbık mezbûr Halil Çelebi’nin muhâsebesi görülüp asl-ı mâl-ı vakf-ı mezbûr beş yük sekiz bin ceyyid ve cedîd akçeden ber mûceb-i defter-i muhâsebe mütevellî-i sâbık mezbûr Halil Çelebi zimmetinde zuhûr eden maldan her biri sekiz dirhem gelir kırk sekiz kıt‘a riyâlî guruş ile on üç bin dört yüz yetmiş fıddî râyic fi’l-vakt bâkī kalmış idi el-hâletü hâzihî zikr olunan kırk sekiz kıt‘a riyâlî guruş vakf-ı mezbûr için tevliyyetim hasebiyle mütevellî-i sâbık mezbûr Halil Çelebi yedinden alıp kabz edip zikri sâbık on üç bin dört yüz yetmiş akçenin dahi vakf-ı mezbûr için alıverilmesi matlûbumdur dedikde gıbbe’s-suâl mezbûr Halil Çelebi dahi cevâbında fi’l-vâki‘ hâl minvâl-i meşrûh üzre olup sâlifü’z-zikr on üç bin dört yüz yetmiş akçe zimmetimde bâkī kalmışdır deyû bi tav‘ihî ikrâr etmeğin alâ mûcebi ikrârihî mârrü’z-zikr on üç bin dört yüz yetmiş akçeyi vakf için mütevellî-i mezbûr Mehmed Çelebi’ye edâ ve teslîm ile mütevellî-i sâbık-ı mezbûr Halil Çelebi ilzâm olunup mâ hüve’l-vâki‘ kayd şüd. Fi’l-yevmi’t-tâsi‘ min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Mehmed Ağa b. Abdi el-Cündî, Mustafa Çelebi b. Hüsameddin, Hamza Efendi nâib-i recül, Mehmed Beşe Çukadâr ve gayruhüm mine’l-hâzırîn.