Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 118 Hüküm no: 91 Orijinal metin no: [20a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fahrî bt. Mustafa’nın ev ve bahçesini Hasan Beşe b. Mustafa’ya satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Çavuş Kasım mahallesi sâkinelerinden Fahrî bt. Mustafa nâm hâtun tarafından bey‘-i câ’i’z-zikri ikrâra vekîl olup mezbûrenin zâtını ma‘rifet-i şer‘iyye ile ârifân olan Halil Beşe b. Resul ve Abdullah Çelebi b. Sunullah nâm kimesneler şehâdetleri ile ve şer‘an vekâleti sâbite olan Mustafa Çelebi b. Ali nâm vekîl meclis-i şer‘de işbu râfi‘ü’l-kitâb Hasan Beşe b. Mustafa nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûre Fahrî Hâtun’un silk-i mülk-i sahîhimde münselik olan emlâkinden olup mahalle-i mezbûrede vâki‘ bir tarafdan Âtike Hâtun mülkü ve bir tarafdan yine müvekkile-i mezbûre mülkü ve bir tarafdan (...) Ahmed Çelebi mülkü ve taraf-ı âharı Ali Beşe mülkü ve mekābir-i müslimîn ve tarîk-i âm ile mahdûd bir bâb tahtânî odaya ve bir sofayı ve zât-ı eşcâr-ı müsmire ve gayrı müsmire bir mikdâr bahçeyi ifrâz ve alâmet-i fâsıla vaz‘ edip beyaz dut ağacından çitlenbik ağacına değin cümle tevâbi‘ ve levâhıkı ile mezbûr Hasan Beşe’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile iki bin nakd-i râyic fi’l-vakt akçeye bâtten bey‘ ve teslîm edip ol dahi minvâl-i muharrer üzre iştirâ ve tesellüm ve kabz ve kabûl eyleyip semeni olan meblağ-ı mezbûru müşterî-i mezbûr yedinden tamamen alıp kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim yokdur. Müşterî-i mezbûr Hasan Beşe’nin mülk-i müşterâsı olmuşdur, keyfe mâ yeşâ’ mutasarrıf olsun dedi deyû bi’l-vekâle ikrâr ve i‘tirâf etmeğin vekîl-i mezbûrun minvâl-i muharrer üzre cârî ve sâdır olan ikrârını mezbûr Hasan Beşe vicâhen ve şifâhen tasdîk ve tahkīk edicek mâ hüve’l-vâki‘ kayd şüd. Fi’l-yevmi’s-sâlis aşer min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hasan Efendi el-İmâm, Ramazan Halîfe el-Müezzin, Hüseyin Beşe b. Mehmed, Ali Beşe b. Mehmed, Halil Beşe b. Resul, Şaban Efendi b. Osman ve gayruhüm mine’l-hâzırîn.