Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 119 Hüküm no: 92 Orijinal metin no: [20b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Meryem bt. Abdullah’ın câriyesi Gülistan bt. Abdullah’ın âzat edilmiş olduğu Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Kiremitçi Süleyman Çelebi mahallesi sâkinelerinden iken bundan akdem vefât eden Meryem bt. Abdullah nâm hâtun icâre-i memlûkesi olup hâl-i hayâtında tedbîr-i mutlak ile müdebbere ey[le]diği işbu orta boylu, açık kaşlı, gök elâ gözlü Rûsiyyetü’l-asl râfi‘atü’l-vesîka Gülistan bt. Abdullah nâm câriye meclis-i şer‘de takrîr-i kelâm ve ta‘bîr ani’l-merâm edip ben müteveffât-ı mezbûre Meryem Hâtun’un câriye-i memlûkesi olup târih-i kitâbdan beş ay mukaddem hâl-i hayâtında bi emrillâhi te‘âlâ ben kazâ-i nahb ettiğimde mu‘taka ol deyû beni tedbîr-i mutlak ile huzûr-ı müslimînde müdebbere eylemiş idi hâlâ mezbûre Meryem Hâtun vefât etmekle ben mu‘taka olmuşumdur. Sebîlim tahlîs olunmak için hâzır bi’l-meclis olan müslimînden istişhâd olunsun dedikde udûl-i müslimînden olup yine mahalle-i mezbûre sükkânından Mehmed Çelebi b. el-Hâc Osman ve Osman Bey b. Ahmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-hakīka müteveffât-ı mezbûre Meryem Hâtun târih-i kitâbdan beş ay mukaddem hâl-i hayâtında ve kemâl-i akl-i sıhhatinde bizim huzûrumuzda câriye-i memlûkesi olan mevsûfe-i mezkûre Gülistan’ı tedbîr-i mutlak ile müdebbere edip ben bi emrillâhi te‘âlâ dâr-ı bekāya intikāl ve irtihâl eylediğimde mevsûfe-i mezkûre Gülistan malımdan âzâd olup sâir harâir-i asliyyât gibi hürre olsun deyû ikrâr ve bizi işhâd etmişdir biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın müteveffât-ı mezbûre Meryem Hâtun’un sülüs-i muhallefâtından mezbûre Gülistan’ın ıtkına ba‘de’l-hükm mâ vaka‘a bi’t-taleb ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Fahrü’l-eimme Mustafa Efendi b. Mehmed el-İmâm, Ebûbekir Halîfe b. Mehmed el-Müezzin, Mehmed Bey b. Ahmed Bey, Mehmed Ağa b. Ali, Ahmed Çelebi er-Râcil, Hüseyin Çelebi b. Hasan, Mahmud Çelebi b. Ahmed, İslâm Beşe b. Abdünnebî, Hüseyin Çelebi b. Hasan ve gayruhüm mine’l-hâzırîn.