Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 120 Hüküm no: 93 Orijinal metin no: [20b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Handan’ın câriyesi İsmihan bt. Abdullah’ı âzat etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’den Zeyneb Hâtun mahallesi sâkinlerinden fahrü’l-akrân Mehmed Çelebi b. Handan meclis-i şer‘-i hatîr-i lâzımü’t-tevkīrde ikrâr ve takrîr-i kelâm edip ıtk-ı rakabât a‘zam-ı kurebât ve sebeb-i duhûl-i cennât-ı âliyât ve vesîle-i ref‘-i derecât olduğundan mâ‘adâ mu‘takın cemî‘ uzvu nârdan âzâd olduğunu nâtık hadîs-i şerîf ve haber-i münîfin mefhûm-ı latîfine ıttılâ‘ımız olmağla orta boylu, açık kara kaşlı, elâ gözlü, sol kolunda alâmet-i cerhi olan Rûsiyyetü’l-asl sâhibetü’l-kitâb İsmihan bt. Abdullah nâm câriye-i memlûkemi, hasbeten lillâhi’l-azîm ve hereben min ikābihi’l-elîm yevme lâ yenfa‘u mâlün ve lâ benûn illâ men etallâhe bi kalbin selîm cemî‘ malımdan ihrâc ve i‘tâk ve tahrîr edip zümre-i harâir-i asliyyâta ilhâk ve idrâc eyledim ba‘de’l-yevm sâir harâir-i asliyyât gibi hürre olup üzerinde hakk-ı velâdan gayrı hakkım kalmadı dedikde hâkim-i muvakki‘-i sadr-ı kitâb tûbâ-lehû ve hüsnü me’âb kıbelinden sıhhat-i ıtk-ı mezkûra hüküm birle mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ aşer min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hüseyin Çelebi b. İsâ Reis-i müezzinîn-i Eyyûb, Osman Beşe b. Ahmed el-Berfî, Halil Çelebi b. Ahmed el-Hallâk, Mehmed Çelebi b. Hüseyin Çelebi b. Ebûbekir el-Berfî, Veli Çelebi b. İsâ el-Kâtib, Receb Bey kethüdâ ve gayruhüm mine’l-hâzırîn.