Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 121 Hüküm no: 95 Orijinal metin no: [21a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Süleyman b. Hacı Mustafa’nın Terkos Mirahor köyündeki ev, arsa ve çiftliğini Beşir Ağa b. Abdülgani’ye satması Mahmiye-i İstanbul’da Edirnekapısı dâhilinde el-Hâc Muhyiddin el-Hammâmî mahallesi sâkinlerinden el-Hâc Süleyman b. el-Hâc Mustafa nâm kimesne meclis-i şer‘-i hatîr-i lâzımü’t-tevkīrde fahrü’l-muhadderât zahrü’l-muvakkarât tâcü’l-mestûrât Gevher Hân Sultan -dâmet ismetühâ- hazretlerinin kapı ağalıklarıyla şeref-yâb olan kıdvetü’l-emâcid ve’l-e‘âlî câmi‘ü’l-mehâmid ve’l-me‘âlî bâ‘isü’l-vesîka Beşir Ağa b. Abdülganî taraf-ı bâhirü’ş-şereflerinden ikrâr-ı âti’z-zikri tasdîke vekîl olup Sefer Ağa b. Mehmed ve Zülfikar Bey b. Abdullah şehâdetleriyle şer‘an vekâleti sâbite olan Ali Bey b. Veli et-Teberdâr mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden Havâss-ı Aliyye kazâsına tâbi‘ Terkos nâhiyesi a‘mâlinden Mirahor nâm karyede vâki‘ bir tarafdan Müezzin Hüseyin Paşa mülkü ve bir tarafdan paşa-yı müşârün-ileyh hazretlerinin halîle-i mükerremeleri mülkü ve bir tarafdan karye-i mezbûre ve bir tarafdan tarîk-i âm ile mahdûd, muhavvata-i dâhiliyyesi bir bâb fevkānî oda ve çardak ve tahtında iki bâb tahtânî oda ve sofa-i tahtâniyye ve bir hamam ve bir matbah ve bir kiler ve bi’r-i mâ ve cüneyne zât-ı eşcâr-ı müsmire ve gayr-ı müsmireyi ve harem kapısı hâricinde bir bâb çatma oda ve bir taş duvarlı oda ve hâriciyye bir matbah ve bir tahtânî oda ve bir fırın ve bir kar kümesi ve bir çatma anbar ve dört bâb ahır-ı kebîr ve bir sundurma ve hâriciyye bir bâb fevkānî kebîr oda ve etrâfında çatakı ve tahtında çatma anbar-ı kebîri ve bi’r-i mâ ve kenîfi müştemil çiftlik ta‘bîr olunur mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık ve çiftlik-i mezbûrda mevcûd üç aded kapaklı tencere ve dört aded kapaksız tencere ve üç aded kapaklı sahan ve üç aded kapaksız sahan ve bir kepçe ve üç aded bakraç ve bir güğüm ve bir kazgan ve bir süt tavası ve üç aded balta ve bir kazma ve dört aded çapa ve bir demir tokmak ve bir demir küskü ve bir çatal-ı? kiçi ve dört burgu ve bir yularlı keser ve bir oluklu keser ve bir sagīr keser ve bir destere ve bir el demiri ve iki tarak demiri ve bir çalı tırpanı ve bir bıçkı ve iki köhne kaliçe ve dört re’s su sığırı öküzü ve altı re’s kara sığır öküzü ve üç re’s su sığırı ineği ve sagīr ve kebîr cem‘an otuz re’s kara sığır ineği ve danası ve sâir âlât-ı zirâ‘at ve esbâb-ı harâsetimi bi safkatin vâhidetin müvekkil-i mûmâ-ileyh Beşir Ağa’ya doksan bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm, ol dahi ber minvâl-i muharrer iştirâ ve tesellüm ve kabz ve kabûl eyledikden sonra yine çiftlik-i mezkûra intimâ ile tahdîd ve tavsîfden müstağnî olup zikri âtî ferâğ ve tefvîzin sudûruna değin zabt ve tasarrufumda olup merhûm ve mağfûrun-leh Sultan Mehmed Hân-ı Fâtih evkāfı’ndan mevâzi‘-i müteferrikada vâki‘ on üç kıt‘a tarla beş kıt‘a çayırlarımın hakk-ı tasarruflarını ve yine merhûm ve mağfûrun-leh Sultan Bayezid Hân-ı Velî evkāfı arâzisinden mevâzi‘-i adîdede vâki‘ her birinin hudûdu inde’l-ahâlî ve’l-cîrân ma‘lûmetü’l-hudûd yirmi kıt‘a tarlalarımın ve altı kıt‘a çayırlarımın hakk-ı tasarruflarını vakfeyn-i mezbûreyn mütevellîleri ma‘rifetleriyle otuz bin nakd-i râyic fi’l-vakt akçe bedel mukābelesinde müvekkil-i müşârün-ileyhe tefvîz bi’l-ferâğ, ol dahi vech-i muharrer üzre tefevvüz ve kabûl edip bedel-i merkūm ile semen-i mezbûr cem‘an yüz yirmi bin akçeyi bi’t-tamâm müvekkil-i mezbûr yedinden alıp kabz eyledim ba‘de’l-yevm emlâk-i mezkûre müvekkilim müşârün-ileyh Beşir Ağa’nın mülk-i müşterâsı ve arâzi-i merkūme dahi dâhil-i havza-i tasarrufu olmuşdur. Keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’l-hâmis aşer li sene isneteyn ve seb‘în ve elf. Şuhûdü’l-hâl: Fahrü’l-e‘âlî ve’l-ekârim İbrahim Ağa Kethüdâ-yı kāimmakām, fahrü’l-müderrisîn Hâfız Şaban Efendi b. Yusuf, umdetü’l-emâcid Ali Ağa b. Abdullah Kethüdâ, fahrü’l-akrân Gazanfer Ağa b. Mehmed, fahrü’l-akrân Mehmed Efendi b. Emin alef, fahrü’l-akrân Hasan Çelebi el-Hammâmî, Mehmed Sipâhi b. Receb zeytin, Zülfikar Bey b. Abdullah ve gayruhüm mine’l-hâzırîn.