Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 122 Hüküm no: 96 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sehergâh bt. Abdullah’ın vârislerinin Cafer Paşa Vakfı’na olan borç hususunda mütevelli ile hesaplaştıkları Medîne-i hazret-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i Kebîr mahallesi sâkinelerinden iken bundan akdem vefât eden Sehergâh bt. Abdullah nâm hâtunun verâseti zevci Mehmed Çelebi b. Hasan nâm kimesne ile sadriye sagīre kızı Rukiye nâm yetîmeye ve kendiyi i‘tâk eden fahrü’l-muhadderât zahrü’l-muvakkarât tâcü’l-mestûrât Ayşe Sultan hazretlerine münhasıra olduğu şer‘an zâhir ve müte‘ayyine oldukdan sonra mezbûr Mehmed Çelebi kendi tarafından asâleten ve sulbiye kızı sagīre-i mezbûrenin tesviye-i umûru için kıbel-i şer‘den mansûb vasîsi olmağın vesâyeten meclis-i şer‘-i şerîfde yine medîne-i mezbûrede vâki‘ merhûm Cafer Paşa evkāfı’na sâbıkan mütevellî olan rafi‘ü‘l-kitâb Halil b. Hüdâverdi mahzarında bi’l-asâle ve bi’l-vesâye ikrâr ve takrîr-i kelâm edip zevcem müteveffât-ı mezbûre hâl-i hayâtında mezbûr Halil Çelebi evkāf-ı mezbûra mütevellîsi iken mâl-ı vakf-ı mezbûrdan her biri yüzer akçeye olmak üzre aylık on beş kıt‘a riyâlî guruş istirbâh ve kabz ve emlâkinden mezbûr Halil Çelebi’ye bir mücevher ön kuşak ve bir çift zümrüd küpe ve otuz bir miskāl bir çift altın bilezik rehin def‘ ve teslîm, ol dahi irtihân ve tesellüm eyledikden sonra zevcem mezbûre fevt olmağın kassâm-ı askerî metrûkâtını tahrîr ve sûk-ı sultânîde cümle verese huzûrunda bey‘ ve deyn-i mezbûru mütevellî-i merkūm benim ve sultân mûmâ-ileyhânın vekîli huzûrumuzda isbât ve edâsına hükm olunmağın rihân-ı mezkûre dahi ba‘de’l-müzâyede ve inkıtâ‘i’r-rağbe üç bin yüz elli akçeye kuşak ve on iki bin altı yüz akçeye küpe ve dokuz bin beş yüz akçeye bilezik bey‘ olunup deyn-i mezkûr edâ ve sâir ihrâcâtdan bâkī kalan meblağ ber mûceb-i defter-i kassâm beynimizde tevzî‘ ve taksîm olunup benim hisseme bin altı yüz on yedi akçe ve sagīre-i mezbûre hissesine üç bin iki yüz otuz üç akçe ve sultân müşârün-ileyhâ hazretleri hissesine dahi bin altı yüz on yedi akçe isâbet ve intikāl edip her birimiz hissemizi alıp kabz eylemişizdir zikr olunan mücevher kuşak ve zümrüd küpe ve altın bileziğe müte‘allika mezbûr Halil Çelebi ile da‘vâ ve nizâ‘ım yokdur deyicek gıbbe’t-tasdîki’l-mu‘teber mukırr-ı mezbûrun yedinde olan mümzâ ve mahtûm defter-i kassâm dahi takrîr-i meşrûhuna mutâbık ve müdde‘âsını nâtık bulunmağın mâ cerâ mezbûr Halil Çelebi talebiyle ketb olundu. Fi’l-yevmi’l-âşir min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Ali Çelebi b. Hızır kâtib-i Eyüb, Mehmed Çelebi b. Hüseyin, Mustafa Çelebi b. Süleyman, Mehmed Çelebi b. Mustafa, Sâlih Mehmed Efendi b. Mehmed ve gayruhüm mine’l-hâzırîn.