Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 123 Hüküm no: 97 Orijinal metin no: [21b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. Luka’nın menzilini Pîrî Bey b. Osman’a satması Vilâyet-i Rûmili’nde Delvine sancağı a‘mâlinden Aydonat kasabası sükkânından Kosta v. Luka nâm zimmî meclis-i şer‘de işbu râfi‘ü’l-kitâb Pîrî Bey b. Osman nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhinde münselik olan emlâkinden kasaba-i mezbûrede vâki‘ bir tarafdan mezbûr Pîrî Bey Bostanı ve tarîk-i âm ile mahdûd bir bâb tahtânî oda ve bir çardak ve cüneyne zât-ı eşcâr-ı müsmire ve gayrı müsmireyi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık dört bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Pîrî Bey’e bâtten bey‘ edip ol dahi vech-i muharrer üzre iştirâ ve kabûl edip semeni olan mezbûrü’n-na‘t dört bin akçeyi tamamen merkūm Pîrî Bey yedinden alıp kabz edip menzil-i mahdûd-ı mezkûru mahallinde zabt ve tasarrufa tarafından mezbûr Pîrî Bey’i taslît eyledim ba‘de’l-yevm menzil-i mahdûd-ı mezkûr merkūm Pîrî Bey’in mülk-i müşterâsıdır. Keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ cerâ bi’t-taleb ketb olundu. Fi’l-yevmi’t-tâsi‘ aşer min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hüseyin b. Supatay?, Diğer Hüseyin b. Abdullah, Memi b. Vat Çelebi, Hüseyin Çelebi Ser-bölük ve gayruhüm mine’l-hâzırîn.