Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 124 Hüküm no: 98 Orijinal metin no: [22a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mühtedi Cafer b. Abdullah’ın kardeşi Yako v. Angilaki’deki alacağı Vilâyet-i Rûmili’nde Yenişehir kazâsı nevâhîsinden Kûhistan nâhiyesine tâbi‘ Kastanya nâm karye sâkinlerinden olup hâlâ Mahmiye-i İstanbul’da mütemekkin olan Cafer b. Abdullah nâm mühtedî mahfil-i şer‘de karındaşı râfi‘ü’l-vesîka Yako v. Angilaki nâm zimmî muvâcehesinde ikrâr ve takrîr-i kelâm edip babamız olup şeref-i İslâm ile müşerref olmazdan mukaddem hâlik olan merkūm Angilaki’nin mecmû‘ metrûkâtı bana ve karındaşım merkūm Yako’ya bi’l-irsi’ş-şer‘î isâbet ve intikāl etmeğin hâlâ babamız hâlik-i mezbûr metrûkâtından bana isâbet ve intikāl eden hisse-i şer‘iyye-i şâyi‘am mukābelesinde mevâni‘den ârî şerâit-i sıhhat-i sulh-i hâvî tehârüc-i şer‘î vechi üzre karındaşım merkūm Yako yedinden iki bin fıddî nakd-i râyic fi’l-vakt akçe bi tarîki’s-sulh ahz ü kabz edip babamız hâlik-i mezbûrun nakid ve akār ve menkūlât ve esâs-ı beyt ve evânî-i nühâsiyye ve gayrı nühâsiyye ve sâir ism-i mâl ıtlâk olunur metrûkâtımdan bana âid olup hisse-i şer‘iyye-i şâyi‘am da‘vâsından karındaşım merkūm Yako’nun zimmetini ibrâ ve iskāt eyledim ba‘de’l-yevm babamız hâlik-i mezbûrun menzil ve bağ ve bahçe ve sâir esâs-ı beyt ve evânî-i nühâsiyye ve gayrı nühâsiyyesi ve sâir ism-i mâl itlâk olunur metrûkâtı karındaşım mesfûr Yako’nun mülkü olup ve zabt ve tasarrufunda olan arâzi dahi dâhil-i taht-ı tasarrufu olup babamız hâlik-i merkūmun mecmû‘ metrûkâtı mahallinde zabta karındaşım merkūmu taslît eyledim dedikde gıbbe’t-tasdîki’l-mu‘teber mâ cerâ bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Mustafa b. Abdullah, Ebûbekir Dede b. Hasan, Mahmud Beşe b. Habib, Hüseyin Çelebi b. Tayyib, Mehmed Çelebi b. Mahmud, Bayram Sofu el-Muhzır, Mehmed Beşe Çukadâr, Hüseyin Bey b. Abdullah ve gayruhüm mine’l-hâzırîn.