Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 125 Hüküm no: 99 Orijinal metin no: [22a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aviro v. Yorgi’nin evi ile tarlalarını kardeşi Todori v. Yorgi’ye satması Vilâyet-i Rûmili’nde Dimetoka nâm kazâsına tâbi‘ Hasibler Karapınar nâm karye sükkânından Aviro v. Yorgi nâm zimmî li ebeveyn karındaşı râfi‘ü’s-sifr Todori v. Yorgi muvâcehesinde ikrâr ve takrîr-i kelâm edip bey‘-i câ’i’z-zikr sudûruna değin mülk-i sahîhinde münselik olan emlâkimden bir tarafdan İstemad mülkü ve bir tarafdan Yanko mülkü ve bir tarafdan Dimitri mülkü ve bir tarafdan tarîk-i âm ile mahdûd bir bâb tahtânî odayı ve bir mikdâr havluyu müştemil mülk menzilimi cümle tevâbi‘ ve’l-levâhık karındaşım Todori’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile iki bin nakd-i râyic fi’l-vakt akçeye bey‘ ve teslîm, ol dahi minvâl-i muharrer üzre iştirâ ve tesellüm ve kabz [ve] kabûl eyledikden sonra yine [karye-i] mezbûre hudûdu dâhilinde vâki‘ bir tarafdan Moskov tarlası ve bir tarafdan Nikola tarlası ve bir tarafdan Devlet nâm zimmî tarlası ve bir tarafdan tarîk-i âm ile mahdûd bir kıt‘a tarla ve yine karye-i mezbûr hudûdu dâhilinde mevâzi‘-i adîdede vâki‘ karyenin hudûdu beynimizde ma‘lûm yedi kıt‘a tarla ki cem‘an sekiz kıt‘a tarla tahmînen otuz keyl tohum istî‘âb eder sekiz kıt‘a tarlalarımın dahi hakk-ı tasarrufları sâhib-i arz ma‘rifetiyle dört bin akçe bedel mukābelesinde ferâğ ve tefvîz eylediğimde ol dahi minvâl-i muharrer üzre tefevvüz ve kabûl eyleyip semen-i mezbûr iki bin akçe ile bedel-i mersûm dört bin akçe ki cem‘an altı bin akçeyi yedinden tamamen alıp kabz eyledim ba‘de’l-yevm menzil-i mahdûd-ı mezkûr ile arâzi-i mezkûreyi mahallinde zabt ve tasarrufa tarafımdan karındaşım mezbûr Todori’yi taslît eyledim min ba‘d menzil-i mahdûd-ı mezkûr mülk-i müşterâsı olup ve arâzi-i mersûme dahi dâhil-i taht-ı tasarruf olmuşdur. Keyfe mâ yeşâ’ mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Niko v. Baniko, Moskov v. Yanko, Enha v. Yorgo, Varci v. Dimo Sovuk Pınarlı, Niko v. Layko ve gayruhüm.