Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 129 Hüküm no: 148 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın uhdesinde bulunan Abdurrahman Ağa’nın tımarını Beşiktaşlı Mustafa Ağa’ya iltizam ettiği Vech-i tahrîr-i hurûf [bu]dur ki Berat-ı şerîf-i âlîşân ile mutasarrıf olduğum Yenice Kalesi mustahfız tımârlarından Kartal karyesi muzâfâtından Yakacık nâm karye ve gayriden Abdurrahman Ağa tımârı denmekle ma‘rûf bin dokuz akçe ve an-nakdin yüz akçe ile ma‘an iki bin akçe tımârımın işbu bin yüz seksen iki senesinin iltizâmını işbu tâlibi ve râgıbı olan dârende-i temessük Beşiktaşlı Mustafa Ağa sene-i sâbıkı üzere bin yüz guruşa iltizâm ve bedel-i iltizâm olan meblağ-ı mezbûru tamâmen ve kâmilen ahz ü kabz olunup gerekdir ki tımâr-ı mezbûr re‘âyâ ve zirâ‘atçileri üzerlerinize edâsı lâzım gelen â‘şâr-ı şer‘iye ve rüsûm-ı örfiye ve nısf-ı tapu ile resm-i bağ ve bahçe ve kaçgun ve yava ve müjdegāne ve resm-i bennâk ve resm-i arûsâne cüz’î ve küllî her ne ki âid ve râci‘ olursa kānûn-ı kadîm üzere ağa-yı mûmâ-ileyhe edâ ve teslîme üzerlerine subaşı bileler tarafımızdan ve taraf-ı âhardan dahl olunmaya. Seyyid Ali Ağa, Mutasarrıf-ı tımâr-ı merkūm hâlâ. Bâlâda mezkûr ve mukayyed temessük sene-i sâbıkı üzere tahrîr[d]e sehv olunmağla yüz akçe an-nakdin hissesi başka bir kıt‘a temessük Seyyid Ali Ağa mührüyle memhûr verildiği ecilden sicill-i mahfûza sene-i sâbıkı tescîli üzere temessük-i vâhid-i mütevâlî tescîl olunmuşdur lâkin hakīkaten minvâl-i muharrer üzeredir.