Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 129 Hüküm no: 105 Orijinal metin no: [23b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tuzcu Hüseyin Vakfı’na ait arsa üzerindeki binanın Hacı Mehmed Çelebi b. İbrahim’e satılması Sâbıkan zînet-efzâ-yı sadr-ı Rumeli olup hırâmân-ı ravza-i rıdvân olan merhûm ve mağfûr Bostanzâde Abdülkerim Mehmed Efendi hazretlerinin necl-i necîb ve mahdûm-ı edîbleri kıdvetü’l-müderrisîni’l-kirâm zübdetü’l-muhakkikīni’l-fihâm Ebûbekir Mehmed Efendi hazretleri taraf-ı bâhirü’ş-şereflerinden ikrâr-ı âti’z-zikre vekîl olup Hüseyin Çelebi b. Mehmed ve diğer Hüseyin b. Mustafa şehâdetleriyle şer‘an vekâleti sâbite olan İmâmzâde Mehmed Efendi b. İbrahim meclis-i şer‘-i şerîfde işbu râfi‘-i kitâb-ı sıhhat-nisâbın sâhibi el-Hâc Mehmed Çelebi b. İbrahim mahzarında bi’l-vekâle ikrâr ve takrîr-i kelâm edip medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Süleyman Subaşı mahallesinde vâki‘ bir tarafdan Murad Beşe mülkü ve bir tarafdan merhûm Şaban Efendi veresesi mülkü ve bir tarafdan Mahmud Beşe mülkü ve taraf-ı râbi‘i tarîk-i âm ile mahdûd menzilin mâliki olan Tuzcu Hüseyin nâm sâhibü’l-hayr menzil-i mezkûru hâl-i sıhhatinde vakf ve haps ve süknâsını ba‘de inkırâzi’l-evlâd sulehâdan bir recül-i sâlihe şart ve ta‘yîn edip lâkin menzil-i mezbûr bundan akdem fevt olan Süleyman Çelebi b. Mehmed’e kıbel-i şer‘den tevcîh olunup lâkin mürûr-ı eyyâm ile harâb olmağla mezbûr Süleyman Çelebi izn-i hâkim ve izn-i mütevellî ile menzil-i mezbûrda mülkü olmak üzre ba‘zı ebniye ihdâs eyledikden sonra fevt olup sene seb‘în ve elf Muharremi’nde menzil-i mezbûr kıbel-i şer‘den müvekkilim müşârün-ileyh Ebûbekir Mehmed Efendi’ye tevcîh olunmağın mezbûr Süleyman Çelebi’nin yetîmleri vasîsi umdetü erbâbi’t-tahrîr ve’l-kalem Mustafa Efendi menzil-i mezbûrda olan ebniye bahâsını müvekkilden taleb ve da‘vâ ve ba‘de’l-keşf otuz beş bin üç yüz seksen iki akçeden ba‘de ihrâci’n-nakz otuz iki bin beş yüz elli üç akçelik binâsı kıymetini müvekkilim mezbûrdan ahz ü kabz ve bi’l-vesâye yedine hüccet-i şer‘iyye verdikden sonra müvekkilim mezbûr dahi malıyla mülkü olmak üzre menzil-i mezbûra bir mikdâr binâ ihdâs etmişdi el-hâletü hâzihî müvekkilim müşârün-ileyh menzil-i mezbûrda mülkü olan ebniyeyi mezbûr el-Hâc Mehmed Çelebi’ye kırk iki bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve ve teslîm ve kabz-ı semen edip ol dahi iştirâ ve tesellüm ve kabz ve kabûl eylemişdir min ba‘d menzil-i mezkûrda müvekkilim mûmâ-ileyhin ber mûceb-i hücec-i şer‘iyye mülkü olan ebniye-i mezbûr el-Hâc Mehmed Çelebi’nin mülk-i mahz-ı müşterâsı ve hakk-ı sarîhidir, keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber hâkim-i muvakki‘-i sadr-ı kitâb hazretleri dahi menzil-i vakf-ı mezkûru mezbûr el-Hâc Mehmed Çelebi sulehâdan olmağla şart-ı vâkıf üzre tevcîh buyurup tasarrufu için hâzihi’l-vesîka bi’t-taleb ketb olundu. Fi’l-yevmi’l-hâdî ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Umdetü erbâbi’l-kalem Mustafa Efendi b. Şaban Efendi el-merhûm, zübdetü ashâbi’t-tastîr Abdullah Efendi ve Muharrem Çelebi ibney Mustafa Efendi, Abdülkādir Çelebi el-İmâm, Hüseyin Çelebi b. Tayyib, Eyüb Çelebi el-Mukayyid, Abdülcelil Halîfe b. Feyzullah, Hüseyin Muhzır, İsmail Çelebi b. Mustafa ve gayruhüm mine’l-hâzırîn.