Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 130 Hüküm no: 106 Orijinal metin no: [24a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Mehmed’in Rus câriyesi Kâtibe’yi âzat etmesi Belde-i mübâreke-i Hâlidiyye medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Câmi‘-i Kebîr mahallesinde sâkin mefharü’l-emâcid ve’l-ekârim câmi‘ü’l-mehâmid ve’l-mekârim Mustafa Efendi b. Mehmed el-med‘uv bi Parmaksızzâde tarafından ikrâr-ı âti’z-zikre vekîl olup Hasan [b.] Abdullah ve Mehmed Beşe b. Receb şehâdetleriyle şer‘an vekâleti sâbite olan Mahmud Çelebi b. Ahmed nâm vekîl meclis-i şer‘-i hatîr-i lâzımü’t-tevkīrde bi’l-vekâle ikrâr ve takrîr-i kelâm edip ıtk-ı rakabât a‘zam-ı kurebât ve vesîle-i duhûl-i cennât-ı âliyât olduğundan gayrı mu‘takın ıtkı mukābelesinde mu‘tıkın cemî‘ uzvu nârdan âzâd olduğunu nâtık hadîs-i şerîf ve haber-i münîfinin mefhûm-ı latîfine ıttılâ‘ı olmağın işbu orta boylu açık kaşlı kara gözlü kara kaşlı dili rekîk Rûsiyyetü’l-asl sâhibetü’l-kitâb Kâtibe bt. ( ) nâm câriyeyi cemî‘ malından ihrâc ve i‘tâk ve tahrîr edip zümre-i harâir-i asliyyâta ilhâk ve idrâc edip min ba‘d üzerinde hakk-ı velâdan gayrı hakkım kalmadı sâir harâir-i asliyyât gibi hürre oldu dedikde hâkim-i muvakki‘-i sadr-ı kitâb hazretleri sıhhat-i ıtk-ı mezkûra hüküm birle mâ cerâ bi’t-taleb kayd şüd. Fî 22 min Şa‘bân sene 1072. Şuhûdü’l-hâl: Mehmed Çelebi b. Ahmed, Mustafa Çelebi b. Mehmed, Mustafa Çelebi b. Pervâne, Mehmed b. Hasan, Mehmed Efendi el-Mütevellî, Hüseyin Muhzır, Börekçi Şaban.