Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 131 Hüküm no: 107 Orijinal metin no: [24a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Mehmed’in meyhanesini Abdünnebi Çavuş b. Hüseyin Çavuş’a istiğlâl yoluyla satması Medîne-i Üsküdar’da Sultanderesi semtinde Selman Ağa mahallesi sâkinlerinden Mustafa Çelebi b. Mehmed nâm kimesne meclis-i şer‘de medîne-i Hazret-i Ebâ Eyyûb-i Ensârî’de Baba Haydar-ı Nakşibendî mahallesinde sâkin fahrü’l-emâsil ve’l-eşbâh Abdi Çavuş b. Hüseyin Çavuş mahzarında ikrâr ve takrîr-i kelâm edip silk-i mülk-i sahîhimde münselik olan emlâkimden medîne-i mezbûrede Balaban iskelesi’nde vâki‘ bir tarafdan sâhil-i bahr ve bir tarafdan Balaban iskelesi ve tarafeyni el-Hâc Ömer ve Deli Kasım mülkleri ile mahdûd bâb mülk meyhânemi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mûmâ-ileyh Abdünnebî Çavuş iki yüz kıt‘a esedî guruşa alâ tarîki’l-istiğlâl bey‘ ve teslîm ve kabz-ı semen edip ol dahi tarîk-i mezbûr üzre ba‘de’t-tahliyye iştirâ ve tesellüm ve kabz ve kabûl eyledikden sonra sâlifü’z-zikr meyhâneyi mûmâ-ileyh Abdünnebî Çavuş târih-i kitâb şehri Ramazânü’l-mübâreki gurresinden altı ay tamâmına değin her ayda ikişer yüz akçe icâre ile bana îcâr ve teslîm edip ben dahi vech-i muharrer üzre istîcâr ve tesellüm ve kabz ve kabûl eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Fahrü’l-müderrisîni’l-kirâm Ahmed Efendi el-med‘uvv bi Kapıcızâde, Ali Çelebi b. Abdullah, Mehmed Çelebi b. Mustafa, Mehmed b. Mahmud ve gayruhüm mine’l-hâzırîn.