Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 132 Hüküm no: 108 Orijinal metin no: [24a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Hızır’ın kiraya verdiği peremenin (kayık) kendisine iadesi Medîne-i Hazret-i Ebâ Eyyûb-i Ensârî’de vâki‘ Câmi‘-i Kebîr mahallesi sâkinlerinden umdetü erbâbi’t-tahrîr ve’l-kalem Ali Çelebi b. Hızır nâm kimesne meclis-i şer‘-i şerîfde peremeci tâifesinden Yusuf Beşe b. Resul nâm kimesne mahzarında üzerine takrîr ve da‘vâ edip bundan akdem bir kıt‘a peremeyi Havâss-ı Aliyye kazâsına tâbi‘ Sütlüce mahallesi sükkânından İbrahim nâm kimesneye beynimizde ma‘lûm ücret ile îcâr ve teslîm edip ol dahi istîcâr ve tesellüm ve kabz eyleyip her bâr ücretini edâ eylediğin mezbûr İbrahim fevt olmağla mârrü’z-zikr peremeyi mezbûr Yusuf Beşe mülkiyyet üzre zabt ve tasarruf eyler suâl olunup kasr-ı yedine tenbîh ve bana teslîm olunmak matlûbumdur dedikde gıbbe’s-suâl mezbûr Yusuf Beşe cevâbında zikr olunan peremeyi ben bundan esbak ( ) nâm zimmîden iştirâ eyledim mülk-i müşterâm olmak üzre zabt eylerim müdde‘î-i mezbûr Ali Çelebi’nin mülkü olduğu ma‘lûmum değildir deyicek müdde‘î-i mezbûr Ali Çelebi’den sıdk-ı kelâmını mübeyyin beyyine taleb olundukda, yine peremeci tâifesinin kethüdâları olan Mustafa Beşe b. Abdülkādir ve diğer Mustafa Beşe b. Abdülhalim nâm kimesneler li ecli’ş-şehâde meclis-i şer‘de hâzırûn olup istişhâd olunduklarında, fi’l-vâki‘ müdde‘î-i mezbûr Ali Çelebi târih-i kitâbdan mukaddem kendi malıyla işbu peremeyi binâ ettirip müteveffâ-yı mezbûr İbrahim’e ücret-i ma‘lûme ile huzûrumuzda îcâr ve teslîm ve ol dahi vech-i muharrer üzre istîcâr ve tesellüm ve kabz ve kabûl eylemişdir biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mâ hüve’l-vâki‘ ketb olundu. Fi’l-yevmi’t-tâsi‘ aşer min Şa‘bâni’l-mu‘azzam li sene 1072. Şuhûdü’l-hâl: Ahmed Çelebi b. Mehmed, Mustafa Çelebi b. Rıdvan, Ali Çelebi b. Hasan, Mehmed Çelebi b. Ahmed ve gayruhüm mine’l-hâzırîn.