Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 133 Hüküm no: 110 Orijinal metin no: [24b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bir kadına tecavüze yeltenen Mahmud Beşe ve arkadaşının kendilerine engel olan Halil b. Mustafa’yı dövdüklerinin tespiti Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Servi mahallesi sâkinlerinden Halil b. Mustafa nâm kimesne meclis-i şer‘de Mahmud Beşe b. Şaban nâm kimesne mahzarında üzerine takrîr ve da‘vâ edip târih-i kitâbdan beş gün mukaddem ben Topçular nâm karye kurbunda Mehmed Efendi çayırından kendi hâlimde giderken mezbûr Mahmud Beşe refîki gāib ani’l-meclis ( ) ile bir ehl-i ırz hâtunu cebren ahz ü kabz ve fi‘l-i şenî‘ kasd eylediklerinden mezbûr hâtun feryâd etmekle ben dahi tahlîs murâd eylediğim ecilden mezbûr Mahmud Beşe ve refîki beni taş ve deynek ile göğsümü darb eylemişlerdir, suâl olunup ihkāk-ı hak olunmak matlûbumdur deyicek gıbbe’s-suâl ve’l-inkâr ve isre’l-istişhâd udûl-i ricâlden Mehmed b. Ahmed ve İbrahim b. Ahmed nâm kimesnelere li ecli’ş-şehâde makām-ı kazâda hâzırân olup istişhâd olunduklarında, fi’l-hakīka târih-i mezbûrda ve mahall-i mesfûr[da] merkūm Mahmud Beşe refîkiyle mezbûre hâtunu cebren ahz eylediklerinde müdde‘î-i mezbûr dahi mersûmeyi tahlîs için murâd etmeğin mezbûr Mahmud Beşe ve refîki müdde‘î-i mezbûru taş ve değnek ile bizim huzûrumuzda darb eylemişlerdir, biz bu husûsa bu vech üzre şâhidleriz, şehâdet dahi ederiz deyû edâ-i şehâdet eylediklerinde mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hasan Efendi b. İbrahim, Mehmed Çelebi Çukadâr, Mehmed Halîfe b. Hasan, Dilâver muhzır ve gayruhüm mine’l-hâzırîn.