Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 134 Hüküm no: 111 Orijinal metin no: [24b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mumcu Dimo v. Adgo’nun kiracısı olduğu Şeyh Hüseyin Efendi b. Ali’ye mumhâne aletlerini satması Mumcu tâifesinden Dimo v. Adgo nâm zimmî meclis-i şer‘de işbu râfi‘ü’l-kitâb umdetü’l-vâsılîn zübdetü’s-sâlikîn vâkıf-ı mevâkıfü’r-rüşd ve’t-temkîn eş-Şeyh Hüseyin Efendi b. Ali mahzarında ikrâr ve takrîr-i kelâm edip müşârün-ileyh Hüseyin Efendi hazretlerinin mülkü olup hâlâ taht-ı icâremde olan tahdîd ve tavsîfden müstağnî şem‘hânede mevcûd akd-i âti’z-zikrin sudûruna değin silk-i mülk-i sahîhimde münselik olan bir kazgan-ı kebîr ve kebîr mengene ve bir mum destgâhı ve altı yüz aded ulağı? ve iki aded fitil kesecek ve bir keser ve bir balta ve bir kepçe ve bir kebîr kantar ve bir sagīr kantar ve bir kevgir ve beş aded fıçı ve sâir beynimizde ma‘lûm mumhâne âlâtımın mecmû‘unu, bi safkatin vâhidetin müşârün-ileyh Hüseyin Efendi hazretlerine altı bin fıddî-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm ve müşârün-ileyh efendi hazretleri dahi vech-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t elli bin akçeyi tamamen müşârün-ileyh Hüseyin Efendi hazretlerinin [yedinden ahz ü kabz edip müşârün-ileyh Hüseyin Efendi hazretlerinin] mumhânesinde ve mumhâne-i mezkûrda mevcûd olan âlât-ı mersûmede vechen mine’l-vücûh alâkam kalmadı müşârün-ileyh efendi hazretlerinin mülk-i mahz-ı müşterâsı ve hakk-ı tasarrufudur, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’l-hâmis ve’l-ışrîn li sene isneteyn ve seb‘în ve elf. Şuhûdü’l-hâl: Mehmed Çelebi b. Yahya, Mehmed b. Receb, Osman Çelebi b. Ali er-Râcil, Mehmed Bey b. Hasan el-Kilârî, Mehmed Efendi b. el-merhûm eş-Şeyh Osman Efendi ve gayruhüm mine’l-hâzırîn