Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 134 Hüküm no: 112 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kigo v. Kiro’nun evini Tanaş v. Dedo’ya satması Vilâyet-i Rumeli’nde Ergirikasrı kazâsına tâbi‘ Lukşan nâm karye sükkânından Kigo v. Kiro nâm zimmî meclis-i şer‘de işbu râfi‘ü’s-sifr Tanaş v. Dedo nâm zimmî muvâcehesinde bi tav‘ihî ikrâr ve takrîr-i kelâm edip bey‘-i câ‘i’z-zikrin sudûruna değin silk-i mülk-i sahîhimde münselik olan emlâkden karye-i mezbûrda vâki‘ bir tarafı Dimo v. Masko nâm [zimmî] mülkü ve bir tarafdan Sava v. Vasil nâm zimmî ve bir tarafdan Luka v. Laki nâm zimmî mülkü ve taraf-ı râbi‘i tarîk-i âm ile mahdûd bir bâb fevkānî odayı ve altında ahırı ve bir mikdâr havluyu ve bir kıt‘a harman yerimi müştemil mülk menzilimi cümle tevâbi‘ ve levâhıkı ile mezbûr Tanaş zimmîye iki bin altı yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ edip ol dahi minvâl-i muharrer üzre iştirâ ve kabûl eyleyip semeni mezbûrü’n-na‘t iki bin altı yüz akçeyi müşterî-i mezbûr Tanaş yedinden tamamen alıp kabz eylediğimden sonra sâlifü’z-zikr menzil-i mahdûd-ı mezkûru mahallinde zabt ve tasarrufa tarafımdan mezbûr Tanaş’ı taslît eyledim min ba‘d benim alâka ve medhalim yokdur, müşterî-i merkūmun mülk-i müşterâsı olmuşdur, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘iyyi’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hüseyin b. Hasan, Ali Beşe b. Hasan, çukadâr Mehmed Çelebi b. Mehmed, Sofu muhzır ve gayruhüm mine’l-hâzırîn.