Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 135 Hüküm no: 113 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kimsesiz olan Polihroni isimli çocuğa nafaka takdir olunması Havâss-ı Aliyye kazâsı tevâbi‘inden Terkos nâhiyesine tâbi‘ Orta Belgrad nâm karye zimmîlerinden Mestori Yani nâm zimmî meclis-i şer‘-i hatîr-i lâzımü’t-tevkīrde takrîr-i kelâm ve ifâde-i merâm edip hâlâ hucr ve terbiyemde olup babası ve anası olmayıp Polihroni nâm sagīrin nafaka ve kisveye eşedd-i ihtiyâcı olmağla men lehü’t-taleb üzerine kadr-i ma‘rûf nafaka farz ve takdîr olunmak matlûbumdur deyicek hâkim-i muvakki‘-i sadr-ı kitâb tûbâ-lehû hazretleri dahi sagīr-i mezbûrun nafaka ve kisvesi sâir havâic-i mezbûresi için târih-i kitâbdan beher yevm beş akçe nafaka mürebbîsi merkūm Mestori Yani talebiyle farz ve takdîr ve inde’z-zarûre istidâne ve lede’z-zafer men lehü’t-taleb üzerine rücû‘a merkūm Mestori Yani’ye izin birle işbu vesîka-i enîka alâ mâ hüve’l-hakīka bi’l-ibtigā sebt ve imlâ olundu. Fî gurreti Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Mehmed Beşe Çukadâr, Receb Bey b. Habib, Hüseyin Çelebi b. Tayyib, Dilâver b. Abdullah, Hüseyin b. ( ) muhzır ve gayruhüm mine’l-hâzırîn